ذكريات لا تموت

[غيثاء]

بسم الله الرحمان الرحيم


السلام عليكم و رحمه الله تعالى و بركاته



اين انتم !!!
على ما يبدو ان الحياه غيرت مسار كل منا ..و اخذت كل شخص الى مكان مختلف عن هنا ... ربما ظروف ...ربما دراسه ... ربما ارتباط ... ربما تغيير فكر

في النهايه لم يبقى احد كما وعد

الكثير الكثير من المواقف و الظروف .. المشاعر.. المشاكل ..النقاشات.. النصائح و ووو.....و غيرها كلها عايشناها سويا هنا ... امور لا تعد جمعتنا ... اتفقنا و اختلفنا ربما حتى تشاجرنا ... في النهايه الاستمراريه كانت العنوان

في وقت مضى وفي اوج عطاء هذا المنتدى ... كنت احمل فكرة وددت لو اجمع كل من احببتهم هنا في لقاء لدقائق لساعات ...لقاء للذكرى ربما ليوم لا يبقى فيه عضو هنا ...تماما كما هو الحال الان ههههههههه

لكل فرد يمر من هنا و قد كان معنا طيله السنوات الماضيه التي بقي فيها صرحنا هذا صامدا .... حدثنا قليلا عن تجربتك هنا وعن اهم ما تحمل للان من ذكرياتك ومواقفك هنا .... لا تدري قد يكون هذا اخر ما يجمعنا مجددا


سلام لجميع الاصدقاء الغائبيين و المغيبين و الحاضرين لكل من التقيته هنا و جمعنا حوار او نقاش او حديث مطول او حتى تسجيل اعجاب بموضوع .... كونوا بخير اينما كنتم

[سجل..انا جزائرية]

السلام عليكم و رحمة الله
وش احوالك يا سارة ? ان شاء الله راكي بخير
صحا عيدك ،، كل عام و انت بخير ،، تعيدي و تزيدي ان شاء الله
كلامك قسملي قلبي ،،، بالفعل واحد ما بقا
كامل زارنا الغياب و دانا
بيت العرب ثققني و علمني شحال من حاجة منها الصبر و القدرة على النقاش و التحاور
،
منحني صداقات عدة لكن و يا للاسف ولا واحد دامت ،، كنت دوما السباقة في السوال ،، اصلهن لكن لا يصلون ،، لا علينا ،، المهم ،، امنت انو الصداقة في الواقع افضل و افضل بكثير
لكن على غرار ذلك كسبت اخوات و اخوان ايضا اشاركهم مناسبات حياتي و اهم احداثها
امثالك و امثال ناجو و الاخوين سيف و كاكاشي

حين ابتعدت عن المنتدى لاسباب قهرية ،، ادركت ان الواقع اهم
صحيح ان العالم الافتراضي يكسبك المهارة و الثقافة لكن الواقع يبقى الاهم فنحن نعيش فيه
نحتاج للماوى و العمل و الاخوة و الزملاء و غيرها مما نحتاجه
لذلك علينا الاهتمام بالواقع و المستقبل و لا ضير من تذكر النت و تفقده و السلام عليه

بيت العرب يبقى في الذاكرة و يستحيل نسيانه
ذلك انه بيتنا في العالم الافتراضي
فحتى في الواقع نغيب عن البيت لكننا نعود اليه حين الانتهاء من الظرف ،، ،،
فنفس الشيئ يحدث هنا
الاختلاف فقط في اننا لا نلتقي ، فنجد البيت فارغا من اهله

احم خرجت على الموضوع قاع ما ديروش عليا
اهم احداثي و ذكرياتي ،، امم كانت مع خديجة نتاع بسكرة و ميرا نتاع خنشلة
سماتني خديجة ماريجا و امينة سماتها كبربسة و انا سميتها شيكولا ،، و مبعد دخلت ميرا معانا و كنا ننلاقاو بيها فالمواضيع ابا سماتها امينة كوجاكة
كنا نضحكو و نلعبو هنا اكثر من الواقع
ندخلو و نضلو نجرو فالمواضيع و رسائل الزوار اييييه
كانو كاينين مواضيع شابين كيما نتاع المدلل و من انا و كرسي الاعتراف
نولو نقارعو للضيف
كيما تلموضوع نتاع من انا نتفكر داروني فيه ،، و في ذاك الوقت كنت هذاك وين بديت نبان فالمنتدى ماكنتوش تعرفوني هههالمهم انا لعبتها قافزة وخر مالطريق برك وليت نسال في روحي بعضويتي و نجاوب بالعضوية نتاع من انا
المهم فوحد الرد متفكرتها مايح كتبت " راكي في قائمة الصداقه نتاعي ههههه "
اني متفكره انا دخلت من ميكرو بالعضوية نتاع من انا
و امينة بميكرو وخداخر بعضويتي نتاع سجل
قلتلها روحي ديري ردود فمواضيع وخداخرا بش ما يفيقوش بلي راني انا هي ،، وهه
بصح تالمو الغبااء بزاف كتبت هديك الضحكة في ذاك الرد و شافني وحد العضو كان كولار متاعو زرق ههه يعني مالادارة يا دلالي ،، المهم جاي يخمم مليح الله يبارك ابا فاقلي بلي رانا واحد
كتب رد بلي انا سجل و انا شفتو ،، بصح من بعد محاه بلخف
و رسلي فالخاص قالي فقتلك مالضحكة بصح راني محيت الرد
قتلن واه شفت
المهم قالي صايي بطلت و راه كاين موفمو و كملي راكي مليحة و قالي نصيحة ما تزيديش تردي بعضويتك الاصليه رح يفيقولك
هههه
و هي اصلا انا ما كنتش رايحة ندير رد غي خديجة قالتلي روحي شاركي و نشوفو يلا نفيقولو
المهم حبست و مام الاعضاء لي كانو يشاركو كل واحد يقولي ما عرفتكش
بقات غي خديجة و انا هي تسال و انانجاوب
و ممبعد قاتلي ماريجا ?
اني متفكرة خلعتني خلعة مريقلة على اصولها
قتلها كي عرفتي قاتلي تفكرت برك كي نهدرو فالزوار ،، بانتلي بلي نتي

العضو الي فاقلي كان االاخ امير المحبة الله يذكرو بالخير

داك الوقت فوت وقت شباب ،، كنت نجي مالسيام اول حاجة نديرها نشعل الميكرو ،،، كنت مهووسة بيه

فالليسي نقصت كومام ،، و دوك الله غالب نرجع مالويكاند للويكاند للدار
،،، اخ ربي يكون فالعون


احم اسمحيلي غيثاء كنت ناوية نكتب كثر و نحكي كثر مي الله غالب
راني نخدم فالتيليفون و راكي عارفة
الميكرو منيش باغية نخدم بيه ،، تبيراطا و راني خايفة 😢😢 ،، غي عضويتي لي ما نسمحش فيها

ممكن نرجع ،، في لامان

[غيثاء]

و عليكم السلام و رحمه الله تعالى و بركاته

اهلا اهلا ..عيشك وانت زادا تعيدي و تزيدي مصيبه ههههههه
ايه ياماااات ما نقسملك قلبك ما والو ماناش ناقصين الحيين يزيدو يروحو ههههههه عجبني ردك راه مزالت الذاكره متقده عندك
عندك حق فالتفاتك للواقع ...بصح مزالني عند رايي ..حتى هذا عالم حقيقي لانو الناشطين فيه حقيقيين والدليل مزالنا هنا هههههههه بالتوفيق لك ومتنسايناش منين تتفكوي موقف ولا اضربي دوره هنا اكتبيه ....

دمت بود

[massi devil]

نهار لسجلت في هاد المنتدى كنت مجرد مراهق
درك كي ندخل لعضوية لقديمة تاعي ونقرا مشاركاتي نضحك بزاف
توحشت راضية هدى .
وبلا مننسا بسمة .

[الأفق القريب]

فعلا ذكريات لا تموت بإندثار الأيام ولا تذهب بذهاب النفوس..
بدءنا هنا ،كبرنا هنا .. مرحنا وضحكنا، وتعرفنا على اناس لن ننساهم ابدا بالرغم من نسانهم لنا..
ندخل لهذا المنتدى تارة لكي نتذكر تلك الايام الخالية ولعل وعسى ان نجد احدهم ولكن ما من مجيب ..
اتمنى ان يكون الجميع بالف خير وصحة وهناء
سمير .. عبد الرحيم .. امونة .. احلام .. دلال .. بثينة وغيرهم الكثير الكثير ممن تعرفنا عليهم من سنوات 2008، 2009، 2010 .. هشام ..

[غيثاء]

المشاركة الأصلية كتبت بواسطة الأفق القريب

فعلا ذكريات لا تموت بإندثار الأيام ولا تذهب بذهاب النفوس..
بدءنا هنا ،كبرنا هنا .. مرحنا وضحكنا، وتعرفنا على اناس لن ننساهم ابدا بالرغم من نسانهم لنا..
ندخل لهذا المنتدى تارة لكي نتذكر تلك الايام الخالية ولعل وعسى ان نجد احدهم ولكن ما من مجيب ..
اتمنى ان يكون الجميع بالف خير وصحة وهناء
سمير .. عبد الرحيم .. امونة .. احلام .. دلال .. بثينة وغيرهم الكثير الكثير ممن تعرفنا عليهم من سنوات 2008، 2009، 2010 .. هشام ..

لا نزال هنا و لا تزال ذكرياتنا معنا ..لم يندثر شيء....رمضانك كريم و اهلا بك من جديد

[عماد مروان حسن]

مشاركة متميزة.. شكرا..