مشكلتي والحساسية

[متأثرة]

السلام عليكم ورحمة الله تعالى وبركاته
أول شيئ أنا نعتبركم أخوتي وأخواتي في مرات نضحكو ونلعبو في مرات يكون أحزان ومشاكل
اليوم جيت نصارحكم بمرضي لأنه لم أستطع أن أحكي لأعز صديقتي أو أعز صديقي قلت نحكيلكم أنتوما وأدعولي بالشفاء ان شاء الله

أول شيئ أنا فيا حساسية الصدر يعني عندي صعوبة في التنفس وهاذي حاجة وراثية من أبي حتى أخي صغير عنده ربو بقينا المهم بقيت عايشة في هاجس المرض لمدة طويلة من صغري داويت ماخليت حتى طبيب حتى نعتولي طب نبوي لي هو (عرعار وعسل الحر) داومت عليهم عامين أو ثلاثة لكن نتيجة هايلة مازدتش شكيت بالربو الحمد لله ومع مرور الأيام رجعتلي الحساسية لكن من نوع أخر لي هي : مين تفوت عليا قطة نعطس ونتقفل من صدري وعينيا تحمر
وتطورت الحساسية تاعي وليت كي نشم التراب ولا غبرة نمـــــــوت ننضر بزاف يعني بكل صراحة يلزمني هواء نهي بدون حيوانات أليفة بدون غبار
المهم لوكان تقرصني ناموسة يتفاقم جرحي وجلدي كامل يتنقط وتولي فيا الحكة
لقيت هكذا سنين لكن هاذ العام في رمضان الكريم ولات عندي حساسية من الأكل
وليت مين ناكل الحوت أو الجمبري أو جبن. حليب. شيكولاطة . بيض .مكسرات..... يتصبغ جلدي يتحول من أبيض الى بني غامق حتى أني يأست من حياتي و من مرضي
ثاني شيئ : الحرارة لالالالا أستطيع البقاء في مكان فيه الحرارة لأنو جلدي يحمر ويتنقط ويأكلني حتى أني في صيف 2015 كان جلدي ينتزع من جسدي يعني عانيت خمسة أشهر. قالولي ناس الخير روحي للبحر يمكن ترتاحي نعتولي plage في مدينة وهران وسمو عين الفرانين فيه عين الكبريت مليح للجلد ورحتلو لكن تسبب لي في الكثير يعني عانيت أكثر وأكثر حتى أني لم أستطع أن ألبس أي شيئ يعني هاذ الحساسية تطورت و ولات عندي حساسية من الملابس يعني اذا لبست أي شيئ أشيئ ينسلخ جلدي من جسمي يعني تخيلو حتى حاجة ماوليت نديرها
الأكل(الحوت الحليب ومشتقاته البيض شكولاطة ومكسرات وكل الحلويات وكل حاجة من الثلاجة.....)
الملابس لاأستطيع أن ألبسها، الشمس تفاقملي من مرضي، الحرارة، الهواء ...... كل شيئ
يعني استسلمت وبكيت بزاف وليت نقول مابقاليش حياتي ضاعت وكل شيئ
لكن تذكرت الله وأنو هاذي الدنيا دارها ربي ليختبرنا وأن الدنيا فانية وكنت وقتما نصلي ندعي ربي يشافيني ( اللهم اني مسني الضر وأنت أرحم الراحمين ) وأستغفر بزاف حسيت راحة في قلبي
وبديت بالعلاج عند طبيبة أمراض الجلدية وراني أقل من شهر الحمد لله ريحت شوية يعني نقول الحمد لله ياربي و جلدي 80% ريح
لحد الآن راني نداوي عندي مع الدكتورة Trétment تاع عامين
ولكن مازال ممنوع عليا الأكل والحرارة والشمس والقطط و كل شيئ له علاقة بهذا ممنوع عليا
وهذا الشفاء بفضل الله أولا وبفضل الطبيبة لها كل الشكر ربي يجازيها كانت مرات ماتخلصش عليا باسكو شافتني في حالة مدمرة ومحطمة
أدعولي بالشفاء خاوتي ربي يجازيكم
والله صارحتكم وأنا حشمانة بصح وش رايحة ندير هذا ابتلاء من ربي وديما نحمدو ونشكرو الحمد لله ياربي
شكرا على مروركم من هنا

[سيف الدين]

وعليكم السلام ورحمة الله وبركاته

تم اعتماد الموضوع، ونعتذر عن التأخر في ذلك

بشأن الموضوع ..

ما تحشمي ما والو أخت الكريمة، الله عز وجل راهو أرحم الراحمين وأرحم من الأم لابنها
وما تدري الخير وين راه، وما تدري العلاج في يد من، الله يشفيك ان شاء الله، وربي يبعد عنك
الضر وهو أرحم الراحمين.

جربي كل الأطباء المختصين وخاصة في مجال الجلد وأيضا الحساسية، وان كنتم ميسوري الحال
فتونس مشهورة ومعروفة بالسياحة الطبية، الله يصلح أحوالكم وان شاء الله نسمعو أخبار مفرحة
عن تخلصك من المرض الي راكي تعاني منو ^^

رعاك الله

[nadjofeva]

و عليكم السلام و رحمة الله و بركاته
أولا اختي الكريمة اتمنى لك الشفاء العاجل
و طهورا ان شاء الله ،
لا تيأسي أبدا و نتي ديري الي عليك و بقاي اداوي حتى ربي يشفيك فهو القادر على كل شيء و ياما ناس مرضت بامراض خطيرة و مزمنة و برات ،
و نصيحتي لك اياك تخلطي في الاعشاب و الطب البديل من دون رأي طبيب مختص درسَ على ذلك ، فليس كل من يبيع هذه الخلطات ووو يفقه حقا في ذلك ، و اياك و استعمال الأدوية و المنتوجات الكيميائية من دون طلب من طبيبتك ،

اما ثانيا ، المرض ياأختي الكريمة ربي الي يعطيه و هو الي ينحيه مع الاخذ بالأسباب
و العلاج طبعا ،و لذلك مانحشموش بيه و ماعندك علاه تحشمي .
ثالثا ، اختي درتي (لي تاست) تع الحساسية ولا لالا ؟؟ و هل طبيبتك سماتلك اسم المرض او قاتلك حساسية و فقط؟؟
و اخيرا حاولي تتصلي بالدكتور جميل القدسي و أرسلي له التشخيص فقد يستطيع مساعدتك و اذا احتجت لشيء راسليني على الخاص .
ربي يشافيك .

[متأثرة]

مشكورين على المرور الآن انا مازالني نعالج وقتلكم ريحت ب 80% يعني راني غاية بصح كون ناكل الحوت و الحليب ومشتقاته وصوالح لي قتلكم عليهم يعاود يوليلي
يعني الشمس والحرارة و الحوت هوما السبب الكبير وايضا لأنه في عائلتي عندنا حساسية ضد الحوت لكن مايصرالهمش كيفي
مي دوك والله الحمد لله راني مع الأدوية راني غاية الحمد لله ياربي