وشكون يحب ينحي الزيتون الجزء 02 ^^

[سيف الدين]

السلام عليكم ورحمة الله وبركاته

أهلا وسهلا بكم في الجزء الثاني من موضوع (وشكون يحب ينحي الزيتون الجزء 01 ^^)

المهم ما كنتش نتوقع أنو راح يكون فيها جزء جديد من هذا الموضوع، لأنو ظهرت فيها
شجرة وانا نسيتها ونسيت بلي فيها الزيتون، المهم هاذي العشية هزيت فيها (سكابو) اي
سلوم نتاع زوج، ومع الساشي (كيس) ورحت ننحي مع جارنا، وبما أنو لما أحيانا تحgر
(تظلم) حاجة يطلع محاينها كبار تبان شجرة صغيرة وانا ما كنتش عارف اصلا بلي
فيها زيتون بزاف الله يبارك، هيا ضربنا فيها من الساعة 14 لحتى 17.30 لما اذن
المغرب ونحينا فيه 3 ساشيات (أكياس) .

المهم انا ما نكذبش عليكم تعبت واحد التعب تقول كاشي ما كنت نخدم .. واحد لما
ينحي الزيتون تبانلو حاجة ساهلة بصح راهي متعبة بزآآآآف وخاصة اذا كنت تلقط
(تجمع) الزيتون الي طايح في الأرض ..

المهم انا مع البداية طلعت مع السلوم (م.سلالم) ولما خلصت جيهتي بقى جارنا طالع في
الشجرة وينحي ويرمي لأنو صعيبة باش ينحي ويجمع في الساشي (الكيس) .

المهم هاذي المرة جبتلكم الصور نتاع الشجرة الأخيرة، وتهنية (ارتحنا) منها








كانت في هذيك المنطقة واحد القطة جميلة لونها أبيض ومبربش (مزيج) كنت حاب نتقدم
ليها وباش نصورها، هيا سيدي راحت هربت ومشات بعيد ..

شكرا لكم على تواجدكم في الموضوع

أخوكم سيف ^^

[nadjofeva]

و عليكم السلام و رحمة الله و بركاته
الله يبارك ،
معليش كي تاكلوه وتدو الفايدة نتاعو ان شاء الله تنساو التعب هذاك ولا تعوضوه ،
و ربما يكون فيه جزء ثالث كيما يوْجَد الزيتون المرقد
شكرا على الصور

[سيف الدين]

المشاركة الأصلية كتبت بواسطة nadjofeva

و عليكم السلام و رحمة الله و بركاته

الله يبارك ،
معليش كي تاكلوه وتدو الفايدة نتاعو ان شاء الله تنساو التعب هذاك ولا تعوضوه ،
و ربما يكون فيه جزء ثالث كيما يوْجَد الزيتون المرقد
شكرا على الصور

الله يبارك فيكم أخت نادجو .. ايه التعب كامل يروح لما نشوفو نتائج نتاع العمل وخاصة لما
الواحد يستمتع بالمذاق نتاعو ، والزيتون نتاع اليوم كان صغير بزاف يعني هو مش
مخصص للترقاد وما يصلحش نشرطوه طوليا وو وانما يصلح فقط للزيت، واحنا راح
نديروه للزيت ان شاء الله، والآخر الي كبير عليه شوي درناه تترقاد ..

ان شاء الله يكون فيه جزء ثالث اذا ماكانش فيه شيء ما معرقل

بارك الله فيك على المرور وعلى تواجدك في الموضوع أخت الكريمة

حفظك الله ورعاك

[ossama mca]

وعليكم سلام ورحمة الله تعالى وبركاته
موضوع جيد ومفيد وبما انني جديد لم ارى موضوع اول ممكن تتطلعوني عليه؟
وشجرة زيتون صعيبة بش تطلعلها وتنحي منها
وشكرا على مفيد

[سيف الدين]

المشاركة الأصلية كتبت بواسطة ossama mca

وعليكم سلام ورحمة الله تعالى وبركاته
موضوع جيد ومفيد وبما انني جديد لم ارى موضوع اول ممكن تتطلعوني عليه؟
وشجرة زيتون صعيبة بش تطلعلها وتنحي منها
وشكرا على مفيد

أهلا بك أخي أسامة .. ايه شجرة الزيتون صيب واحد يطلعلها بسبب الأغصان نتاعها
والغبرة الي تحملها، بشأن الجزء الأول من الموضوع راهو مجرد كتابة وما فيهش صور
وهذا هو الرابط

وشكون يحب ينحي الزيتون الجزء 01 ^^

شكرا ليك خويا على المرور، الله يعطيك العافية

[ossama mca]

يسلمك خويا سيف دين
وكاين شجرة تعبك اكثر من شجرة زيتون
جرب نخلة ياولك تاكلك من شوك لي فيها هههههههههه

[سيف الدين]

المشاركة الأصلية كتبت بواسطة ossama mca

يسلمك خويا سيف دين
وكاين شجرة تعبك اكثر من شجرة زيتون
جرب نخلة ياولك تاكلك من شوك لي فيها هههههههههه

شجرة النخلة راهي تقتل العباد بسبب العلو نتاعها
شكرا لك على تواجدك ثانية في الموضوع أخي

الله يحفظك

[ossama mca]

خواتي نقدر ندير موضوع حول اشار كل عدد على نوع من اشجار
مثل ليوم برتقال 2 ليمون3 موز.........

[سيف الدين]

المشاركة الأصلية كتبت بواسطة ossama mca

خواتي نقدر ندير موضوع حول اشار كل عدد على نوع من اشجار

مثل ليوم برتقال 2 ليمون3 موز.........

عادي اذا الأمر متعلق باليوميات نتاعك تقدر تحط في هذا القسم
وانت أدرى بمكان الموضوع، تصفح أقسام المنتدى وشوف القسم
المناسب

بالتوفيق لك

[ossama mca]

هههههههههه
لكن انا نتسلقها بسهولة ههههه
ورقلة يعلموك