قسم يوميات العضو

سجل..انا جزائرية · 2013-03-18, 03:57 PM

السلآم عليكم و رحمة الله و بركاته

وش راكم اولادي بناتي اخواتي الشقيقات اخوتي في الله صديقاتي الحبوبات اصدقائي النشيطين

ان شاء الله بخيــــــــــــــــــــــــــر ^^

كامل نحبو نسافرو في العطلة ...شعارنا الفاكونس اندار بش نحوسو ياك

انا نتفكر بكري كي كنت كبيرة قصدي كنت صغيرة ..كانت العائلة الي عندها لوطو راهي جد غنية

و كامل افرادها زواخين

احم كان الوالد نهار يقول النهار الفلاني نروحو للبحر ...كامل يفرحو

لدرجة انهم يديرو زردة و يعرضو الجوارين بش ياكلو الطعام

كامل الغاشي يعرف بلي يا ودي هاذو راهم رايحين للبحر ^^ >> مخلوعين الله غالب <<

بون نهار يقولك باباك رانا رايحين للبحر ...شهر من قبل و نتا توجد

فالنهار تولي تقول ندي هاذ السروال و نلعب البالون

و فالليل ما ت**** وحدك مي تبات مع اللعاب نتاعك >> حاشاكم <<

المهم هاهو جا النهار الي نروحو فيه كامل العايلة فرحانة لدرجة انك تحسب راهم رايحين لماريكان

و الحاجة الاكيدة لازم كامل يروحو و الله يجعل كاين 20 راس معنتها 20 راس تشوفو داخل فاللوطو

حصريا ما يجري داخل السيارة او كما نسميها بالعامية اللوطو :

طراااااااااااااااخ

( هاذ الطفل بلع (غلق ) الباب زعما )

اول حاجة و قبل ما يدور راسو راهي الصفعة تكلمت فيه من عند الزعيم الاب ..(داير عمامة زعما)

الاب : ** ما تعرفش تبلع الباب فاني

الاخ قاعد قدام رجلين الوالدة من جيهة مقعد السيارة : ما عندوش باب في دارهم واقيل

الابن قاعد في الخلف فالوسط: ما عليش كي نرجعو فكرني بش نعلمك كي تبلع الباب

الاخ الاكبر قاعد في الخلف من جيهة التاقة ( النافذة ) حاط يديه على فمو و يضحك غي بالشوي باه ما تتكلمش فيه الصفعة

الابنة قاعدة فوق الطابلو نتاع اللوطو من الامام : سااابق لا تتردد لاحق الفوز مؤكد لا لن يهزم ابدا من سعى ....

الرضيعة في حجر امها : وععععععع وعععععع وععععععع

الام : اش اش اش صايي صايي ....و نتوما دوك رايحين نحوسو و لا ندابزو ؟؟ .. يلا هك غي خلوني في داري خير لي

الابن الي بلع الباب يكلم الطفل الي قاعد عند رجلين امو : ما كان ما دخلك ..اقضب لوطوتك و العب بيها و لا نقولك ارواح نعلمك كي تلعب

و يدور للاخر الي كان يضحك ... : ما تضحكش بزاف لا يطيحو سنانك ما نقبلوش العجايز فاللوطو

و يكمل مع الي من جيهتو : الها في روحك لا نضربك ضربة وحدة تخرجك مالتاقة تصيب روحك فالدار

الاب يخزر فيه : واقيلا خاصك صفعة اخرى ...؟

...

الام : شغل البوست و لا ما تقوليش ما كاش ؟

الاب : لالا كاين كيفاش هاذي ما كاش .....

تشش شش ششتششش

اوه الاذاعة راهي مبلعة واقيل و يخزر في الام بنص عين

الام: ........

الاب دور راسو للتاقة :: اففففففف

الام : ما تقولي لا افف لا آآفف لا اييف ..هاذي كي نرجعو للدار نتفاهمو عليها

الاب : ..

الاخ : عجابتك كسكيطتي ( قبعة )

الابن : ها ؟؟

الاخ : قلتلك مليحة كسكيطتي ؟

الابن : ها ؟؟

الاخ: الكسكيطة عجباتك ؟؟

الابن : ها ؟؟

الاخ : ما تسمعش و لا تلعب فيها ؟؟

الابن : شحال تعطيني لو كان نقولك رايي ؟

الاخ : زيدو في روحك ما خاصنيش

يدور للاخ الزاوج

: وش رايك في كسكيطتي مليحة ؟

الابن : ها ؟؟

الاخ : الكسكيطة شابة عجباتك ؟؟

الابن : شا راك تقول سباقيطي ؟؟

الاخ : شربت القهوة الصباح ؟؟

الابن : واه

الاخ : باه شربتها ؟

الابن : الكسرى نتاع البارح علاه ؟

الاخ : انا قلت بالاك كليت التبن

بعد مدة

الابن : ياااااا شريت كسكيطة ؟؟

: صباح الخير

: صباح النور ...بصح قولي من وين جبتها ؟؟

: صاحبي سلفهالي

: شكون ؟؟

: ما تعرفوش

: شكون

: قدور........ياااو قلتلك ما تعرفوش ب السيف ياو

....

اف و اخيـــــــــــرا وصلت عائلة المزرعة السعيدة للبحر هع

وصلو 8 نتاع الصباح . من فم و هوماا يعومو لحتى جوعو

بيانسور ياكلو و يرجعو يعومو

كي ولات ال3 نتاع العشي

الاب : قدور قويدر قادوري قادوراني خاجية خيرة

>> اسماوات و صايي نتوم علاه راكم تحوسو <<

هيااااااا خفو رانا رايحين

...

فالطريق

الام : فوت فوت خلينا نشرو الخضرةو وية فاكية

الاخ : شوف شوف من فم >> يهدر مع خوه <<

الان : هات هات يا الشيخ هنا ما نعيوكش

يكلم خوه : البصل و البطاطا ما نستحقوهمش حطهم في لامار >> صندوق السيارة <<

و هاذو خليهم هنا

اكيد هجوم على الطماطم الدلاع البطيخ العنب التين الموز

يلا الطريق فيها 6 سوايع معنتها 6 سوايع و هوما يعلفو

و نهار يوصلو

الاخ : و الله غير عيينا اليوم

الابن : مالصباح ما كليت والو

الاب : حطينا العشا خلينا بش نروحو نرقدو

...........

اما دوك يا عجبا

الطفل بالهراوة بش يخلي ذاك الميكرو و يروح معاك للبحر

يركب فاللوطو يرقد و يقولك كي توصلو نوضوني

الطفلة تهدر فالبورطابل مع صحبتها

نهار يوصلو

الاخ ما تشوفوش قاع ..تلقاه يمشي فالشط مرة على مرة يصور روحو بش يحط الفوطو فالفيس بوك

الطفلة قاعدة فالكرسي دايرة الكيتمان و تسمع للغنا

اما الاب راقد على كرشو ( البطن ) و يشمس

و الوالدة تشوف فالبحر و تطرطق فالشوينغوم > العلك <

توتة توتة خلصت الحتوتة ...ايا تشاو تشاو

عجباتك ما عجباتكش قريت ما قريتش

الفايدة هي الرد

بيسك كاين الرادار الي نحكمو ما يردش مالشعر نجبد

في امان الله

sweet · 2013-03-18, 04:13 PM

هههههههههه

عجبتني الحكاية و بالأخص هدي
يلا الطريق فيها 6 سوايع معنتها 6 سوايع و هوما يعلفو هههه

المفيد صح تبدلت العقلية بزاااف

واحد ما ولا يحمل لاخر

انا وحدة من الناس خويا جامي تفاهمت معاه

كًبـريسـة~العلجِيـ،ـة · 2013-03-18, 04:35 PM

ههههههههههه كح كح كح لا تعليق

يقلك عيش تشووف

الموفمو حاجة فوور

يعطيك الصحة وسلامة الكلافيي قصدي سلامة يدك

~زهرة الصداقة~ · 2013-03-18, 06:23 PM

ههههه حكاية و لا اروع و واقعية 100 بالـــ 100 ههه

موضوع ممتع صراحة كلشي منك يجي ممتع

مشكورة

خنشلية ومايعجبلي العجب · 2013-03-18, 06:27 PM

هههههه

لا حول ولاقوة الا بالله

عدنا كاتبة وحنا ماعلابالناش عدنا مواهب في لمنتدى الله يبارك

هذي سير صراتلك ليك ثاني

وصح والله كيما قولتيها وجبتيها فرق كبير بين بكري ودرك

يعطيك الصحة عجبلي طرحك للموضوع

سجل..انا جزائرية · 2013-03-18, 07:26 PM

اقتباس:

المشاركة الأصلية كتبت بواسطة sweet

هههههههههه

عجبتني الحكاية و بالأخص هدي

يلا الطريق فيها 6 سوايع معنتها 6 سوايع و هوما يعلفو هههه

المفيد صح تبدلت العقلية بزاااف

واحد ما ولا يحمل لاخر

انا وحدة من الناس خويا جامي تفاهمت معاه

ههه مليح كي عجباتك

صح كلش تبدل فهاذ الوقت ...

صحيتي ا بنتي ... ربي يحفظك

اقتباس:

المشاركة الأصلية كتبت بواسطة amina589

ههههههههههه كح كح كح لا تعليق

يقلك عيش تشووف

الموفمو حاجة فوور

يعطيك الصحة وسلامة الكلافيي قصدي سلامة يدك

ارواحي ارواحي لهنا نضربك على ظهرك

باينة عليك جامي ضحكتي

الموفمو مليح بصح المباصية غي اللوطو مسكينة

تولي تسحب في رجليها بش تمشي

و الدليل نهار يتلاقاو بدودان لازم قاع يخرجو منها

و يعاودو يرجعو يركبو من جديد

طيري زعما لازم تحشمي البنادم

يدي و الكلافي يسلمو عليك

سيف الدين · 2013-03-18, 07:27 PM

السلام عليكم ورحمة الله وبركاته

ما شاء الله عليك، شاطرة ربي يبارك ^ ^، شَفّولي جماعة السيارة والابن والأخ ووو هههه
ربي يحفظك اختي وشكرا لك على المجهود، واصلي ولا تفاصلي وبانتظار كتاباتك المميزة
والحصرية

.. دمت في حفظ الله ووداعته ^ ^

اشعة الشمس · 2013-03-18, 07:35 PM

هههههههههههه
حكاية تهبل زوزو راكي فنانة واقعية
عندك الحق كلش جبتيه صحيح

سجل..انا جزائرية · 2013-03-18, 07:37 PM

اقتباس:

المشاركة الأصلية كتبت بواسطة momo10

ههههه حكاية و لا اروع و واقعية 100 بالـــ 100 ههه

موضوع ممتع صراحة كلشي منك يجي ممتع

مشكورة

ربي يحفظك >> ما تحشمونيش

>>

سرني مرورك اختي مروة

بارك الله فيك غاليتي

اقتباس:

المشاركة الأصلية كتبت بواسطة عيون جزائرية

هههههه

لا حول ولاقوة الا بالله

عدنا كاتبة وحنا ماعلابالناش عدنا مواهب في لمنتدى الله يبارك

هذي سير صراتلك ليك ثاني

وصح والله كيما قولتيها وجبتيها فرق كبير بين بكري ودرك

يعطيك الصحة عجبلي طرحك للموضوع

مانيش مامنة هاذ الرد نتاع طاطا ميرا ؟؟

انا من بكري و انا نقولكم انا موهوبة و نتوم تقولولي حابسة غبية مفرينية وععع

تقريبا النص صرالي كي كنت طفلة

و النص خرطي برك خخ

صحيتي صحيتي كيما يقولو ردك شهادة اعتز بها هع هع

بصح ارواحي ما يدونيش لقهوة القوسطو ؟

خنشلية ومايعجبلي العجب · 2013-03-18, 07:47 PM

اقتباس:

المشاركة الأصلية كتبت بواسطة سجل..أنا جزائرية

مانيش مامنة هاذ الرد نتاع طاطا ميرا ؟؟

انا من بكري و انا نقولكم انا موهوبة و نتوم تقولولي حابسة غبية مفرينية وععع

تقريبا النص صرالي كي كنت طفلة

و النص خرطي برك خخ

صحيتي صحيتي كيما يقولو ردك شهادة اعتز بها هع هع

بصح ارواحي ما يدونيش لقهوة القوسطو ؟

درك نبدل رايي قولتلك ماتزيديشي تقوليلي طاطا في بلاصة اخرى غير لبروفيل

علابالنا لخرطي كثر من الصح

لالا مايدوكش مش لدرجة هذي موهوبة يعني بشوي بشوي على روحك

المواضيع المتشابهه للموضوع: يامات زمان و دوك ...ارواح تشوف العجب ..( بقلمي البايخ )
الموضوع	كاتب الموضوع	المنتدى	مشاركات	آخر مشاركة
مجموعة خامات ملونة	azizhm	قسم مستلزمات وملحقات التصميم	2	2014-10-05 07:40 PM
حالات الصمت	ithriithri80	القسم العام	3	2013-09-22 01:40 PM
الزواج الالكتروني.................. عيش تشوف!!	saw_v7	قسم التسلية والترفيه	22	2012-10-19 05:19 PM
ارواح كنت نتمسخر ~.~	خنشلية ومايعجبلي العجب	قسم التسلية والترفيه	31	2012-10-13 01:20 PM

جديد مواضيع منتديات بيت العرب الجزائري

			تذكرني