بين مكه و المدينه ريحة الجاري ...~صح مولودكم ~..شاركونا

[nadjofeva]

السلام عليكم و رحمة الله و بركاته
الحمد لله بخير ، السؤال عليك؟

أمم فلحق ماكنتش رايحة ندير رد بصح قلت الطفلة مسكينة دارت موضوع و تعبت و ماناش نشوفوها كل يوم ،
و هذا الرد كتبتو في نفس يوم ادراجك للموضوع و مابعثتوش و ليوم راني زدت عليه شويا ،

حنا مانحتافلوش بيه كعيد ،
مي كاين عادات يديروهم هنا في المنطقة ،

منها المنارة و يديرو فيها الشمع هادي في البيوت ،
و في المدينة يصنعو منارة كبيرة و يدورو بيها في المدينة و يشعلوها طبعا (هي شابة
و لكن ...) ،

و الحاجة الي تعيي تع الصح "المحارق" ،
آه صدعونا بيهم مالصباح حتى لليل و هوما يديرو فيهم و واحد الأصوات مزعجة،
ماشي قال هدوك تع الالوان الشابين على الاقل الواحد يستمتع بالمنظر (ياو دارولنا –تلوث- الأذن بيهم) ،

و أسوء حاجة كيما تخرجي في هاد النهار ولا يامات قبل ولا بعد المولود ، نورمال كاش ماطيرلك عين ولا يد ولا كاش ما عفسة ،
يرمو عليك نورمال ،

و ماشي غير من الاطفال ، مرة خرجت أنا
و والدتي قبل اسبوع بالاك من المولود حتى واحد راجل كبير رما محيرقة علينا و واحد شاب قال لأمي بالاكي يما لمحيرقة ،
و قالو وعلاش علاش هديك واعرة كيفاش ترميها عليهم،
سبحان الله مرات نحير الشاب الي ينصح فالراجل لكبير ،

و كيما كنا صغار أظن في الابتدائي كنا نشعلو الشمع في الدار انا و شقيقاتي ، تعطيهملنا تقريبا عمتي ربي يحفظها (الي حكيت عليها وحد الوقت) و كانت تعطيلنا وحد لمحارق شحال هايلين مايأذو ما يديرو أصوات مزعجة ،
ولا يشريهم مرات والدي هدوك الملونين الشمع ماشي لمحارق ،
و النوالات ايضا مانيش عارفة كيفاش تقولولهم ،

و دوكا مانديروش، (بصح والدي جاب النوالات مي ماشي باش نشعلوهم في هدا اليوم ههه يعني وقت مانفحتلنا كي يشوفهم يتباعو يشري مرات ،
أصلا شعلنا واقيلا زوج ولا ثلاثة قبل المولود بأيام و راهم قاعدين هكاك)،

و نطيبو الرشتة في السنوات الأخيرة ، هنا في المنطقة يطيبو الرشتة أيضا ،

يديرو تانيت الطمينة مام هنا،
و العفسة لي وليت صح نحير كيما نسمعها ولا نقراها هاد لعام برك خاصة لي لاحظتها عبارة -صحا مولودكم- ولا مولودكم بالصحة و الهنا- يعني هذو العبارت .
زعما واش معنتهم

شكرا على الموضوع مركي