ارواحوا نحكيكلم عن العطل الدراسية في الخارج

[سيف الدين]

السلام عليكم ورحمة الله وبركاته

ان شاء الله تكونوا كامل بخير وأموركم كلها تمام

حبيت نحكيلكم عن العطل الدراسية في اوروبا وبالتحديد في فرنسا .. احنا في الدزاير
معروف عندنا انه عندك عطلة خريفية المهم يدخلك فيها 1 نوفمبر ويزيد فيه يوم الاحد
والاثنين والثلاء وقالك يوم الاربعاء ترجع تقرا والخميس نفس الشيء !! وزايد واش
يقولولك العطلة بتداء من 31 اكتوبر وهذا اليوم راهو يوم خميس انت راح تقرا فيه
ويقولك العطلة يوم 31 !! وزيد يحسبلك الجمعة والسبت يخي هذوك من بكري راهم
ويكاند !!

المهم عندكم في العطل العطلة الشتوية والربيعية .. المهم كما نحسبو من سبتمبر لحتى
اواخر ماي وش حال تقراوا امم 8 اشهر مع العطل مثل 1 ماي و اممم نظن هذا مكان
مادام المحرم طاح في الويكاند وزايد العاشروء قالك راح تطيح ان شاء الله في الويكاند
.. المهم باش نزيد نقولك بلي ماكانش الزهر في هذا الدخول المدرسي مع محرم
والعاشوراء ونزيد نكملكم بلي واحد ماي طاحت يوم الجمعة

المهم هذا مش موضوعنا بعد ما حكينا فيه ياسر .. حبيت نقولكم بلي في فرنسا مثلا وهذا
خبر أكيد انه التلاميذ نتاعهم يقراوا شهر ويعطيولهم 15 يوم عطلة ويزيدوا يقراوا شهر
وعندهم 15 يوم عطلة وهكذا !! هوما كما يعطيولهم العطل هكذاك سما يخليوا الطالي
يتنفس ويخليوه يبدع ويحب القراية .. هاو احنا عندنا غير 15 يوم نتاع الشتا و15 يوم
نتاع الربيع وانا حساب ما نشفى بكري كنا نديوا غير سمانة في الربيع وسمانة في الشتا
وهاذي العطلة الخريفية غير السنوات الاخيرة برك داروها بكري كانت ماكانش هههه
المهم الوزارة نتاعنا حابة تخرج عباقرة بالسياسة نتاع التقشار نتاعهم .. ولكن التعليم
في الجزائر راهو يمشي للهاوية .. وربي يقدر الخير ان شاء الله

المهم صح انو فيه عوامل كثيرة الي تأثر على الابداع والتميز في التعليم، ولكن في الجزائر
كاشي حاجة تصلح مثلا !! حتى العطلة ولاعبين رواحهم فايقين وشاطرين، في حوايج
اخرى لا خبر .

الي غاضني ان في العطلة نتاع نوفمبر من الجمعة ما يقراوش لحتى الثلاثاء ولغدوة يبكر
يقرا والخميس كيفكيف والجمعة عطلة، يا سيدي كمل الاربعاء والخميس وفرات !!
يخي حالة يخي.

هاذي كامل كنت عانيت انا مثلكم كل يوم اقرا اقرا، ولكن كما تطلع للجامعة ان شاء الله
وحساب التخصص نتاعك ممكن تضرب من الاحد لحتى الخميس ومن الساعة 8 لحتى
17 مساء.

هذا العام هو عام اخير لي ان شاء الله عندي فصل واحد فقط دراسة والاسبوع الجاي
هو اول اسبوع دراسي لي ان شاء الله شهرين وجاية العطلة نتاع 15 يوم ومبعد ممكن
اختبارات ومبعد التفرغ لمذكرة التخرج.

ههه طلعت كتبت بزاف، المهم مجرد اخراج مكبوتات نتاع السنوات الخوالي في الثانوي
والمتوسط والابتدائي، ايام مريرة من ناحية العطل .


اخوكم سيف