صح راهي حاكمتني غمة ...بقلمي

[صقر الجبال]

باش نبداللك يا خويا راهي حاكمتني غمة
وانا من طبعي قلبي حنين وكبير

الناس قلوبهم قساحت وتنحات منها الرحمة
وبلسانو يدبحك في هداك التعبير

اللي جاتو الموت يرضى بالحمى
وواش من هدرة تقول وواش تدير

ايلا من الحبيب يجي نهار وتترمى
وينساك ويرميك في بير

اتكل على روحك يا خويا وزير المحزمة
واعلنها ثورة وغير في روحك دير الخير

هدا هو زمانا تغيرت فيه الحكمة
ورجعت الجاجة تقول للديك راني نطير

الشادي في وقتنا طلع شعرو ودار الشمة
حكاية جديدة هدي نحكيهاللك تحير

كان مسكين كي يفقر نديرولو ملمة
يهبط راسو ويقول ولله ماننسى هاد الخير

افتح عليه ربي وصاب الخدمة
قلنا يستاهل من هدا الكثير

مع الوقت انفتحو عينيه ورجع مولى كلمة
يساري بيدو حاسب روحو زعما مير

عطاتو يا خويا والدنيا هدي قسمة
والتكبر علاش ياخويا كنت فقير

ولا نسيت كي كنا نديروللك الملمة
كي نهدر علاش مايصرا حتى تغيير

شبعت منهم وصح حكمتني غمة
هدرت وانشاء الله كنت احسنت التعبير


اخوكم حسام بقلمي