التكنولوجيا وما دارت فينا !!

[سيف الدين]

المشاركة الأصلية كتبت بواسطة nadjofeva

الحمد لله ان شاء الله أنتم ايضا بخير
اني عارفة نخرج على الموضوع و نكتب بزاف فيه لذلك سمحولنا مسبقا لانه موضوع متوسع

الحمد لله أنكم بخير، احنا رانا في رحمة ربي والحمد لله

ايه الموضوع راهو واسع نتيجة الأمور الجانبية الكثيرة الي تسبب فيها، وعادي أخت
الكريمة سنستفيد منك ان شاء الله ..

و ليت ذلك توقف عند اللحم فقط ،و كذلك الخضر المعدلة وراثيا و الفواكه ووو تغير فيها خلق الله كما يقول الدكتور جميل القدسي
و
العلم مليح بصح كي نستعملوه في الخير و ليس العكس،
كيما راهم يحاولو استنساخ الانسان معقول و فرضا استنسخو خلاياه و الروح ثان يديروها فيه أخخ مانعرف كيفاش يخمو،

وكيما قالت لنا استاذة الحيوان عمرو ما اخل بتوازن البيئة و الطبيعة و لكن الانسان دائما يخسر و من بعد يحاول يسgم فالكثير من "ليديسيpلين" داروهم باش يصلحوا الاخطاء و الكوارث الي تسبب فيها الانسان يعني تأنيب للضمير،
مثلا البلاستيك من منا الآن لا يعرف خطورته في الطبيعة بصح مازال الناس ترمي في الأكياس برا

ايه صح كاينة منها، الانسان راهو يتسبب في الكثير من الامور الي خلاتو ممكن يحس
بتأنيب الضمير كما تفضلتِ، ولكن ممكن الأمر يكون فيه مصالح نتاع مجموعة ما،
ممكن تلعب دور في افلاسها، مثلا كما الفواكه والخضر الي تلاعبو فيها وعدلوها وراثيا
من أجل باش يكثروا من الانتاج وزايد الربح السريع، اذا يحبسوهم سما كاين طرف
معين راح يخسر، وأيضا في اختلال دور البيئة، واحد المرة شاهدت شريط وثائقي حول
صيد الحيتان الكبيرة، وقانونيا راهو ممنوع وممكن تنقرض مع مرور الوقت وبالتالي
التوازن نتاع الأرض راح يختل

بشأن نتاع استنساخ الانسان، راهو أمر غريب فعلا وين وصل العلم، ووين ولاوا العلماء
يخمموا ويفكروا، ربي يبقي اللطف برك، كاشي ما يعطينا العقاب بسبب الأفعال هاذي
الشنيعة ..

الهواتف و الحواسب بغض النظر عن خطورتها من الجانب الصحي ، الناس ولات تستغلها لافساد حياة الغير فأصبحنا نخاف من الخروج من البيت ففي أي لحظة قد يلتقطون لك صورا و يتلاعبون بها و ستجد نفسك في العالم الافتراضي، ووو كما أنك في بيتك
و معرض للخطر كالاختراق ،.. يعني كي اطيح التكنولوجيا في يد ناس ماتحشمش ...

ايه صح كاينة منها، وصرات عندنا هنا في المدينة نتاعنا أكثر من المرة، وأصحابها ما
يستاوعبوش الدروس بالرغم من أنهم يدخلوا السجون بسبب أفعالهم التي يندى لها
الجبين، إلا أنهم يعاودوا يكرروا الفعل نتاعهم، ربما لازم تكون فيه اعادة هيكلة للسجون
وتلعب دور التربية والتوعية ..

والموضوع نتاع الصور راهو يخوّف صراحة، ويصدمني صراحة، ولكن فيه جانب
ممكن يكون أخطر، وهو أنني قريت أنهم يسحروا أشخاص عن طريق الصور نتاعهم،
هنا وين شوكيت نتاع صح، يعني سواء شاب ولا شابة ممكن يكونوا في الخطر،
وسمعت قصة في هذا الجانب مش عارف اذا صحيحة أو لا، وهو أنهم لقاوا قط الفم
نتاعو مخيط وكما نحاولو الخيط هذاك لقاو في فمه صورة نتع الانسان، والانسان هذاك
كما شافو الصورة نتاعو راحو يحوسو ويسقسيوا عليه، وكما لقاوه، لقاوه في حالة
يرثى، والمصير نتاعو كان مربوط بهذاك القط، أي بما أن القط فمه راهو مخيط يعني ما
ياكل وما يشرب، يعني مع مرور ايام يموت، واذا مات القط هذاك الانسان الي سحروه
يموت معاه، حتى أنهم في المقابر لقاوا مجموعة من الصور نتاع الناس،.. هذا كامل
الناس الي ما تخافش ربي وللأسف المشعوذين عندنا راهم معرفوين وللأسف الدولة ما
تحاربهمش، مش كما السعودية، وان شاء الله تتحسن الأمور وتنقرض هذه الظاهرة
وربي يشفي الجميع وربي يحفظ الجميع من الشرور ما ظهر منها وما بطن ..

وبشأن الصورة ممكن البعض راح يتخلع من المعلومة وخاصة الناس الي تظهر في
الاعلام وو قريت من واحد المشايخ قالك مش شرط وجود الصورة يتم سحر شخص
معين وانما لازم تتوفر معاه حاجة أخرى ممكن قطعة من اللباس وو ..

وربي يهدي ما خلق لأنو الموضوع خوفني.

صحيح لا يمكن ان تتصوروا شحال وليت موسوسة صح مليح تكون على علم و اطلاع بهذي الامور بصح تولي تشك في كل حاجة فمثلا الآن مستحيل ان اتناول شيئا بدون أن أقرأ كل مكوناته سواء أكان منتوجا محليا او لا ،
ولو أنه احيانا مايكتبوش كل المكونات المستعملة ،
و بالحديث عن المكونات ماننساوش المضافات الغذائية (les additifs alimentaires)بهدف حفظ المنتوج اكثر و تحسين الذوق ووو و لكن من جهة اخرى يؤدي تراكمها في الجسم الى تسممات و خطورة صحية خاصة على المدى الطويل ...

نعم صح في بعض من الأحيان ما يكتبوش كل المكونات الي المتوفرة في هذيك المادة
وشكرا لك على المعلومة بشأن المواد التي تحسن الذوق.

في الياوورت أيضا لم أسمع بها،

ايه حتى في الياوورت، شفتِ هذاك الياوورت الي زعما مرسوم فيه فراز ولون نتاعو
مايل للوردي وو، هذاك كما تقراي مكونات نتاعو تلقاي فيه حرف e وبعدو أرقام، مش
متذكر الرقم الي يجي بعد حرف e ممكن 123 أو 124 لا أتذكر أي من الأرقام، المهم
كما تحوسي على هذا الرمز في النت تلقاي بأن المكونات نتاعو عبارة عن حشرة نظن
تكون موجودة في الصنوبر يحكمو يرحيوها ويحطوها في الياوورت، ومبعد يجي
يقولك فراولة !! وهوما ما يكتبوش المكونات كما هي، مثلا يقولك من كذا كذا ويزيد من
حشرة فلانية .. هنا حتى واحد يولي يشريها، حتى أنني في هذاك الوقت قريت أنه فيه
مشايخ حرموها.

تذكرت بالنسبة للحشرات مثلا الكاشير يقولو بلي البعض يصنعوه من لgرلو ،
و شفت مرة فيديو يحكمو كل الحيوانات و يرحوهم في وحد المصنع و هم احياء يدخلو البقرة الحصان الخنزير الحمار ،..
و يرحوهم في آلة كبيرة و هوما على قيد الحياة لا ذبح و لا هم يحزنون معقول و يخلطوهم و يديروهم كاشي ولا pاتي و الكارثة اذا ماكانوش يكتبو ذلك في المكونات ، و هذا في دولة متقدمة تدعي حماية الحيوان بل و تفعل ذلك علنا

أتخيل كان يصدرولنا منتوجا من هذا النوع لا قدر الله

أخاه على لgرلو .. بشأن الكاشير راهو هنا في الولاية نتاعنا كان تسبب في حالات
وفاة بسببو، وللأسف بما أنو كانت فيه حالة مقاطعة للكاشير ونقصت المبيعات نتاعو،
كثرت الاعلانات نتاعو في التلفاز زعما ينعتلك كيفاه يخدموه، بصح ما ينعتلكش كيفاه
يرحيوا المكونات !! ووللأسف باش يتم معاقبة هذيك الشركة بسبب الأرواح الي راحت
بسببها، ولاوا يزيدو يدعموها بالاعلانات في التلفاز، وربي يلطف.

ايه هذيك نتاع الدولة المتقدمة، راهي متخلفة في بعض من الأمور حسب الفيديو الي
شفتيه، الله أعلم أين هي الجمعيات لحماية المستهلك !! مالا اذا صار هذا في الدولة
المتقدمة، مالا أحنا على الدولة نتاعنا ما نحكيوش خلاص

صحيح مئة بالمئة و كي نشوفو ناس بكري كيفاش عاشو و صحاح علينا لأنو ثان كل شيء كان طبيعي ،
بصح نفضل نشك و مانكونش جاهلة لأن الجهل هذا ادى الى قتل الكثير من الناس في وقتنا بما ان كل شيء تقريبا أصبح مصنعا و غير طبيعي،

نعم صحيح، الواحد يكون شكاك أحسن ما يكون جاهل، لأنو الجاهل كما قلتِ ممكن
يطفرها في روحو، ونتاع بكري كما قلتِ كما كان كلش نتاعهم طبيعي كانو ما يشكوش
من الأمراض، وربي يقدر الخير ان شاء الله.

و بالنسبة لي تخصصي في الجامعة أفادني كثيرا في حياتي اليومية و لكن ماشي خلاني موسوسة و برك و في البيت أعلق أحيانا على كل شيء أخخخ هاذي ماتاكلوهاش ماشي مليحة و هذيك ماتشروهاش راهي تحتوي على كذا و هذاك لازم يطيب ووو
حتى امي مرات تقولي هاهي جات الطبيبة معليش بنتي تخلي قرايتك شويا بعيد و مرات يعجبهم الحال بالرغم ان والداي مثقفان (لست طبيبة بمعنى الكلمة تعبير مجازي فقط)، بصح انا مانقدرش ،

الله يبارك فيكم وفي عائلتكم الكريمة، وربي يزيدلكم من علمه وينفع بكم.

مثلا البطاطا حنا قرينا بلي البطاطا الخضراء (ماشي الي ماشي طايبة يعني الي فيها جزء أخضر) ولا المتبرعمة ماشي مليحة لأنها تحتوي على مادة سامة هي "السولانين" و بالتالي يجب تتنحا هذيك المنطقة الخضراء تماما و المتبرعمة و الا مانشروهاش و مانستعملوهاش لكن أحيانا يجيبها والدي و تكون هكاك و مايقدرش يرجعها و انا كي نطيب نرمي نصها مستحيل نطيبها هكاك و انا عارفة بلي ماتنفعش و كي اجي والدتي تشوف حبة البطاطا ولات ربع حبة تنخلع و تقولي وينراهي البطاطا نقولها رميتها راكي عارفة قتلك الي تكون خضرة مانديرهاش يا ترجعوها ولا ماتشروهاش يا نرميها أخخ،

بشأن البطاطا صح قريت واحدة المرة عليها، وحنا واحد المرة كنا جبنا البطاطا
بالصندوق، وكما طولت شوي مع مدة أصبحت خضراء مالا حكمنا طيشناها، والآن كما
اليوم في السوق كما شرينا بطاطا لقيناها مدودة مع أنو ما تبانش في الخارج، وقبل ما
نشريوها قلنا للبائع البطاطا نتاعك فيها الدود قالك هكذا كامل في السوق، وقريت في
الايام القليلة الماضية أنو في ولاية من ولايات الغرب راهم يغشوا المشترين بالبطاطا
نتاعهم لأنو راهي مجمدة وهوما يحكمو يديرو عليها التراب باش ما تبانش !!

لأنو الخسارة الحقيقية كي ياكلها الواحد و يمرض (قد أعود الى شرح هذا الأمر في مدونتي أو موضوع آخر )،

نعم صحيح ممكن البطاطا مثلا نحكموا نرميو نصها، أو أي فاكهة أخرى أو الخضار،
أحسن ما تجي في صحة الانسان، لأنو الصوارد راهم يتعوضو بصح صحة الانسان لالا.

و أيضا بالنسبة للبيض ، معروف أن البيض و اللحوم و الدجاج معرضين الى عدوى بكتيريا السالمونيلا الخطيرة و بالتالي يجب أخذ الاحتياطات فالبيض مثلا ملازمش يتغسل قبل وقت طهوه لأن المسامات ستفتح و اذا كاين كاش مكروب يدخل ،

ايه قريت واحد المرة على هذه المعلومة الي قلتي عليها، بصح مش عارف البيض أحيانا
أكرمكم الله يكون موسخ، وما تصلحش نكسروه وهو موسخ، أو ممكن تكون فيه طريقة
ما نتاع تكسير البيض أو ممكن تكوني تقصدي غسله في الفترة قبل طهوه مباشرة.

و الدجاج أيضا مليء بالبكتيريا و لازم كي نغسلوه ننظف المنطقة لي غسلناه فيها مليح كما أنه من الأفضل أن نضعه في الماء و الخل قبل طهوه و يجب طهوه جيدا لأن الحرارة تقتل بعض أنواع المكروبات
و نفس الشيء بالنسبة للخضر ،..

سمعت أيضا على الدجاج قالك ما تغسلوه ما والو وانما طيبوه مباشرة !! مش عارف اذا
صح أو لا، لأن الوالدة واحد المرة قرأت ان الدجاج لازم يتغلى بالماء باش نطيبوه أو
نقليوه .. والله أعلم

بشأن الماء والخل قرأت واحد المرة من الاستاذ جميل القدسي أنه حتى الفواكه أيضا لازم
تتشمخ في الماء مع الخل بسبب المكونات الي ترش بها وهي في الأشجار ..

بارك الله فيك أخت الكريمة على الرد الكريم وكذلك على المعلومات التي استفدنا منها
والتي أستفاد منها غيرنا أيضا، الله ينفع بك ألبشرية .. وربي يزيدلكم من علمه.

دمت بخير ان شاء الله