صلة الرحم.... أفيدوني جزاكم الله خيرا

[متأثرة]

السلام عليكم ورحمة الله تعالى وبركاته
نتمنى تكونو غاية؟؟
بغيت نشاركم موضوع عائلي ان شاء الله تفيدوني ربي يجازيكم

عندي جدي متزوج ثلاث نساء تزوج الاولى جابت معه بنت(زوجته ماتت)
تزوج الثانية(جدتي) جابت معاه بابا وماتت
تزوج الثالثة جاب معاها عشرة، 6أولاد (عمامي) و 4 بنات (عماتي) زوجة جدي للآن حية
هاذي زوجة جدي حرمت علينا كل شيئ بمعنى الكلمة حرشت جدي على أبي قبل مايتزوج أبي يعني كرهاته ومابغاتوش يقعد معاها، جدي بغا يعطي بابا دراهم باش يشري سكنة، امراة جدي حرشاتو قاتلو كون تعطيه نخرج من دار، كرهت بابا لدرجة كبيرة لأنه مش من كرشها حgراتو ماعطاتو والو يعني ورث جدي تنعمت فيه غير هي و أولادها يعني بابا وبنت جدي من المرأة الأولى حرمو حرمان كبير من الورث لأنه جدي مشاء الله بخير عليه
بابا من كثر لي نضر تمسك بالدراسة نتاعو ولأصبح أستاذ في الفيزياء ومرت جدي ماقبلتش ....
بابا تزوج أمي وصار مشاكل كبار يعني جدي عنده فيلا فارغة صافي مرت جدي عطات لبابا شمبرة وحدة يرقد فيها ويطيب فيها
وجدي كان وينما يحب يدير مشروع لبابا يعني avenire توقفلو مرت جدي وتقولو يا أنا يا ولدك أيا جدي يحبس ويخاف وحد لمرة امرأة جدي كانت مدابزة مع أختها وبابا كان واقف قدامهم أيا شعلو بيدون تاع ليسونس وبابا دخل في المشكل تحرق بابا من رجليه في زوج يعني تشوه خلاص وقعد في الكومة خمسة أشهر والسبب هو مرت جدي(مرت أبوه) ورغم أنو قعد في مستشفى خمس أشهر والله لعظيم ثلاث ما خافت ربي وطلت على بابا في المستشفى والله ماراحتلو
لكن رغم كل شيئ بابا وماما يحترموها بزاف ويخافو من ربي
المهم هذاك القوم الجدة هي وبناتها ماخافوش ربي رغم أنها جايبة عمرة ويصلو ليل مع نهار ويذكرو بصح يكرهو بابا وماما حتى أحنا ولادهم يكرهونا بزاف ويغيرو منا تحسب ماراناش ولاد خوهم لكبير
المهم عمامي لولاد يحبونا بزاف ومايبغوش علينا ضرك راهم كبار بأولادهم كانو يقولو لبابا سامحنا رانا عارفين بلي يمانا حقراتك أنت وزوجتك(على أمي) عشتو الذل وستحملتوها ومارفعتوش صوتكم عليها....
لكن بنات جدتي(زوجة جدي) ولاو كيما أمهم يكرهونا ويحقرونا بصح كلما يحقرونا ويذلونا أحنا نرجعوهالهم خير ونضحكو ونستحملوها في قلوبنا ومابينولهمش بلي غاضنا الحال
مات جدي من أربع سنين وأصبحت جدتي وبناتها يكرهونا أكثر وأكثر يعني ولاو يخلصو غاية ويتكبرو علينا وحنا أصلا الحمد لله ماراناش نتاع مادة بصح هوما نتاع مادة لي يصرف عليهم يديروه فوق الراس ولي يجي يديه فارغين يزعقوه احنا الله غالب عايشين حدنا حد رواحنا
هاذي قصتنا بالمختصر وكون نحكي مايكملوش الحكايات المهم حنا رانا صافيين عند ربي بصح هوما حسبي الله ونعم الوكيل على واش دارو فينا وفي بابا وفي ماما

المهم هوما عندهم في الربيع يروحو رحلات في الصيف يروحو لبحر يعني مايخلوش بلاصة يروحولها ويأخدو معاهم كامل ولاد عمامي يعني (ولاد خاوتهم) غير حنا لي ولادة الأخر الكبير من الأب مايحوسوش علينا
وأنا جامي في حياتي حوست كيفهم ولا ديت فاكونس
هاذ الصيف جات خالتي تاع فرنسا قاتلي تروحي معايا لوهران تعقدي يامات وتعاونيني قتلها مكانش مشكل بعدما طلبت الاذن من بابا
المهم رحت معاها والله غير رحت عاونتها في شغل الدار يعني ماخرجناش حوسنا
قعدت عشرة أيام في وهران مين جيت رحت أنا وماما عند جداتي رغم كل شيئ قلت لماما نروحو عند جدة توحشتها وتوحشت بناتها
رحنا واذا بنا دخلنا نلقاهم الكل يشوفو فيا بنص عين العمة لكبيرة سلمت عليا بتشناف يعني ماقيموناش غاضهم الحال قالولي راكي داخلتها تحواس كون راكي تجي تعاونينا ....طاطاطاطاطاطاط يعني غاضني الحال
وقلت لماما أعطيني مفتاح الدار خلاص ماعدتش نستحملهم خلاص وخرجت نبكي من عندهم حتى لدارنا خرجت ماما من ورايا قاتلي والله مانسمحلهم لدنيا لا أخرة وأنا حلفت قلت والله مانحط رجلي في هاذيك الدار خلاص ماعدتش نستحملهم أنا توحشتهم رحتلهم على نيتي وهوما طردوني من الدار
من ذاك اليوم عندها أربعة أشهر مارحناش ليهم ولينا نتلاقاو في طريق نسلم على مرت جدي لاخاطرش كبيرة وماحقش عليا نفوتها ونسلم على عمتي الكبيرة من المرأة الاولى وهوما نفوتهم وحتى هوما ماراهمش يشوفو فيا لا في ماما

والله والله والله وربي شاهد عليا والله غير توحشتهم ومين نلقاهم في طريق ويفوتو عليا ومايشوفوش فيا تغيضني عمري والله أنا واماما وبابا مانفوتوهمش أي حاجة نوقفو معاهم مام يضرونا ويعايرونا نستحملو في وجه ربي ونروحو ليهم (هوما أصلا ماراهمش عادينا بلي حنا ولاد خوهم ) وماراهمش عادين بلي بابا خوهم

أنا المشكل لي راه يدور في راسي هل عليا اثم أنا وأمي مين ماراناش نروحو عندهم يعني مين قطعناهم يعني نتعدو من قاطعي صلة الرحم؟؟؟ ربي يعذبنا على هاذ الشيئ ولالا؟؟؟؟
والله ماراهي لافوت فينا هوما حاقرين بابا و ولاده لي هوما حنا وماما
ملاحظة : رغم أنهم يسكنو حدانا ب عشرين مترا يعني تخرج من بابنا تلقا بابهم بصح يفوتو على دارنا ولا في حياتهم قالو نجو ندخلو نطلو على خونا لكبير ولا على ولاده
عكس تعامل تاعهم معانا مع ولاد عمامي لخرين يعني لخرين يحبوهم بصح حنا لالا
يعني صباح رحت لقبر جدي جات عمتي لكبيرة مامبا ماشافاتش فيا ماسلمت عليا يعني حنا وياهم خلاص مابقاش بيناتنا صلة
الله يخليكم كاش واحد يعرف في هاذ حوايج يجاوبني على أسئلتي
نتعذبو عند ربي ولالا على قطع صلة؟؟؟ جاوبوني بليز

[سيف الدين]

وعليكم السلام ورحمة الله وبركاته

الحمد لله رانا بخير والحمد لله أخت الكريمة، ان شاء الله تكوني أنت أيضا بخير ^^

بصراحة الوضع الي عانيتوه مع زوجة جدك لا يحسد عليه، الناس راهي تعاني من أشقائها الي من امهم
وابوهم فما بالك من الأشقاء من غير الأم، الله يكون في عونكم وربي يصبركم وما تخليوش هذا الموضوع
يشغلكم، وألتاوا بالأمور الي هي الأهم نقصد هنا الاقارب الطيبين، لانو كل ما زاد تركيزكم على الاشخاص
الي يسببوا لكم المشاكل كلما زاد الوضع سوء.

بشأن السؤال نتاعك نتاع قطع صلة الرحم، انا من وجهة نظري وواش قريت عليه من الناحية الدينية
هاذوك مش من الأرحام نتاع والدتك يعني أمك اذا ما تروحش ليهم راهي معفية ومش مجبرة او تدخل في
دائرة قطع الأرحام، ولكن والدك من المفروض لازم يضرب طلة سلام وسلام وانتهى، واذا تجهالوكم
وسببوا لكم المشاكل هذا مش ذنبكم أنتم، هوما السبب وهوما الي يديرولكم في المشاكل وبطريقة غير
مباشرة مش حابين يشوفوكم، يعني لازم تشوفوهم وتزوروهم وهوما مش حابين يشوفوكم!!!! نظن هنا
ومن وجهة نظري لالا لانو راهم يسببوا لكم أمراض وخاصة من الجانب النفسي وانت قلتي انك خرجتي
من دارهم مع البكاء ووالدك تسبب في حادث جسدي ودخل في المستشفى !!

المهم في موقع اسلام سؤال وجواب راني لقيت شخص تتطرق للسؤال عن حالة شبيهة بحالتك وأجابو
عليه، المهم هذا هو الرابط نتاع الموضوع:

ماذا يفعلون في أقارب يؤذونهم ؟ هل يهجرونهم ؟

وهذا سؤال فيه اجابة باش تعرفي وشكون هوما الأرحام الي معنيين بصلتهم:

من هم الأرحام الواجب صلتهم ؟



هذا واش عندي، وان شاء الله يفيدوك الاخوة والاخوات
وربي يكون في عونكم ويبعد عنكم السوء والمشاكل.

في امان الله

[متأثرة]

الله يحفظك ربي يجازيك
أنا همي الوحيد هو كيفاه نلقا ربي أي غاضب عليا ولالا شكرا على الاجابة ربي ينور وجهك

[متأثرة]

لالا أمي عندها صلة أقارب معاهم صافي جدي تقولو ماما ولد عم ماما
يعني جدي يجيها ولد عم ماماها وحتى مرت جدي تجي لماما عفسة كيما هاك تاع ولاد ولاد العم
يعني رانا لقب واحد قاع في العائلة