الأمّ تخدم والإبن في الحضانة

[ossama mca]

السلام عليكم أهل اللمة الكرام والافاضل
ان شاء الله راكم لاباس؟
ربي يحفظكم جميعا ويهنيكم ويوفقكم ان شاء الله
أما بعدن ندخل في الموضوع مباشرة ولي راهو واضح من عنوانو نظن
وهو "المرأة العاملة وتأثير عملها على أبناءها"
بصراحة قبل ايام شفت حصة على التلفاز تحكي على مكانة الحضانات لي يحطو فيها الأطفال في وقتنا الحالي
لأنو نص الأمهات ولاو عاملات وبحكم الأب والأم يخدمو الإبن أكيد يحطوه في الحضانة
وفي هاد الحصة نعتو بعض العينات تاع الناس لي تحط ولادها تما، بصراحة المشكل لي حيرني ووجعلي قلبي
لما شفت الأم هاديك تعدل وتلبس ومن بعد تروح تنوض ولدها لي عمرو 4 سنوات وهو مسكين مازال حتى ماشبعش رقاد
تزرب تبدلو حوايجو وراجلها يوجد في الحليب في الكوزينة ومن بعد يفطرو بزربة ويخرجو يديو ولدهم للحضانة،
انا لي وجعلي قلبي لما شفتهم خرجو من فيلا الله يبارك وركبو في سيارة الله يبارك
يعني باينين لاباس عليهم وربي يزيدهم، درك لي وجعلي قلبي هو هاد الأم لي عطاها ربي الدار وعطاها
ظروف معيشة مليحة علاه تمرمد في ولدها؟؟
لما مرأة تخرج تخدم باه تعيش ولاد يتامى ولا باه تجيب زوج دورو توكل بيهم عايلتها ماتغيضش
كل واحد وظروفو، بصح وحدة لاباس عليها علاه ماتقعدش في دارها تربي ولدها وتخليه يشبع من الحنان تاعها؟
انا مارانيش نهاجم في المرأة العاملة تحب تخرج ولا تحوس ربي يسهل عليها بصح الملايكة هادو لي رانا نعذبو فيهم
لدرجة تشوف طفل صغير جايبينو في زورة ويخليوه تما في الحضانة ويشبع بكا على فراق والديه.
انا راني نهدر هكا خاطر عشت هاد التجربة، لأنو ماما كانت خدامة وكنا بزوج دورو هادوك معرف لاكان نتعشاو ليلة ولالا
ومازلت نتفكر المعاناة تاع طفل يخرج من الدار ويتمرمد،
باه تنوض بكري على 5 ونتا مازالت في عمرك 6 سنين وتزرب تغسل وجهك بالماء البارد
باه تفطن ومن بعد تخرج في الظلمة وتتوكل على ربي باه يجي البيس هاداك وهادا اذا جا
يعني ماش ساهلة، انا ماراني ضد حتى انسان، ومارانيش نهدر في الجانب الديني ولا جانب آخر
نحكي على قلب أم تشوف ولدها مرمد كل صباح وهي تروح باه تحوس ماش حتى باه تخدم
سامحوني اذا تعديت حدودي لكن لما نشوف براءة كيما هكاك يعانيو بسبب أمهات والفو الخرجة والتحواس نتقلق
واذا راني غالطة قولولي
معليش نتعلمو من بعضانا
وربي يوفقكم جميعا
تحياتي