بليز لي يفهم في الدين الاسلامي يساعدني بليز

[متأثرة]

السلام عليكم ورحمة الله تعالى وبركاته
نطلب منكم طلب بليييز لي عنده شيخ تاع جامع ولا امام ولا أي شخص يفهم لأمور دينية
يسأل والله لا يضيع أجر المحسنين. كون تساعدونيي في هاذ القضية ربي يجازيكم
- كان في عمري 19سنة كنت نشمي انا وصحبتي كان يمشي حدانا واحد سرقني يعني حقرني وسرقني كان مع زوج ولاد كي سرقني هرب يعني شفت شوية من وجهو وشفت الجهة الخلفية تاع راسو
مين سرقني انا مابكيت ماوالو تخلعت وكان وقت لممغرب كنت راجعة انا وصحبتي لدار من عند أختها كانت ماما سابقتني قدامي
مين سرقني حتى واحد ما وقف معايا كل المارين كانو يمشو عادي غير شخص واحد لي وقف معايا ربي يجازيه
المهم صحبتي قاتلي ماتسكتيش على حقك وروحي شكي بيه
رحت شكيت بيه عند الشرطة، بعد التحقيق معايا وكل شيئ وراولي تصاور
تعرفت عليه في وحد تصويرة وكنت متأكدة بلي هو لي سرقني باسكو موالف يسرق ويدخل للسجن
ايا عرفتو قتلهم هذا هو الشخص داوني ليه في السجن كنت انا وبابا، وكاين صاحب بابا شرطي قالي مام تعرفيه قولي ماعرفتوش باش مايضلوش مجريينك ومطلعينك ومهبطينك قتلو صحة، بصح انا مين وراولي تصاور غاضتني عمري وخفت قلتلهم واه هذا هو.
المهم بعد التحقيق وطلعي وهبطي جا الوقت لي نشرعو فيه
بابا قالي قولي راني مسامحاتو
وهذا السيد قالي انا ماسرقتكش والله ماسرقتك قالي خاطيني سرقة لبنات قالي نسرق غير لولاد
كي شفتو هكذاك غاضني المهم
مين رحنا للمحكمة تخيلو هذا السيد كان سارق 10 أشخاص كاملين جاو يشكو بيه كاملين وقفوا وواجهوه في المحكمة
وحد رجل كبير في السن ضاربه بسكين وسارقلو دراهمو
رجل صغير يكون في عمر 40 سارقه وضاربه بسكين
يعني خلاصة الموضوع هذا السيد سارق وضارب بالسكين يعني موت و لا عيش المهم نسرقك وندي دراهم فهمتوني؟
المهم حضرت الجلسة لولة وهو يقولي والله ماسرقتك يابنت الناس
انا كنت متأكدة بلي هو مي مين قوات عليا الهدرة ولاو يقولولي بلاك ماشي هو راكي مشبهاتو
بلاك حصلتي فيه وماعرفيتش تفرقي في الوجه
دخلني الشك بلي ماشي هو لي سرقني ................................مشكــــلة
دخلني الشك بزاف لدرجة وليت نتوسوس ونقول صح ماشي هو
وعمه يلقى بابا برى يقولو بنتك هي السبة هو قاع ماسرقهاش
فهمتوني؟
المهم انا مازدتش حضرت لمحاكمة
حضرو هاذو 10 رجال لي كان سارقهم كامل سمحوله وسامحوه وقالولو ماتزيدش تعاود مالغري حياتهم وكاين لي تجرح ودخل سبيطار فهمتوني
دوك هذا السيد حكمو عليه سبعة سنين سجن
و عمه يلقى بابا يقولو ولد خويا ماسرقش بنتك
يقوله بسبت بنتك ولد خويا عطاوه 7 سنين حبس
أنا شكيت في روحي ضرك راه عندي 23 سنة كي نتفكر بلي يمكن راني ظلمتو نولي نبكي ونخاف نتحاسب مع ربي
ربي يقولنا نغفر كامل الذنوب الا لي يأخذ حق شخص مانغفرلوش يتحاسبو يوم القيامة
خايفة بزاف من الله خايفة اذا كنت غلطت في حقه على الرغم هو موالف يحكموه سجن بسبب السرقة كل مرة يدخل السجن
بصح لي في بالي كلمة انا مانسرقش لبنات نسرق لولاد فقط وكامل لي معايا ولاد غير أنا بنت
خايفة نكون ظلمته
وحاجة أخرى خايفة كون يخرج من السجن ونكون صح ظالماتو يعرف دارنا ويخلف الثأر مني
والله راني نظلي نبكي بسبب غلطة ماكنتش نعرفلها
الله يجازيكم سقسولي كاش امام ولا شيخ يعرف في الدين
وأجركم عند الله

[سيف الدين]

وعليكم السلام ورحمة الله وبركاته

اللصوص بصفة عامة لما يسرقوا عمرهم ما يقولولك بلي أنا الي سرقتك، وكتاه يعترف؟ يعترف لما يكون
تحت طائلة التعذيب، ثم يعترف ويقولك أنا صح إلي درت حاجة هذيك، باش يجي واحد ليه ويقولو أنت
سرقت فلانة؟ مستحيل يقولك أنا إلي سرقت وسامحوني وما نزيدش نعاود!!! واذا كانت فيه أدلة قوية هنا
راح يقول بلي فلان الي قالو اسرق، ولا ينوض يبكي واااع ماما ماكانش واش تاكل، ماما راهي مريضة
وراني نسرق باش نداويها،.. !! هذا كامل باش يأثر على الشخص الآخر ويقولو معليش روح سماح
برك !!

المهم بما أنك حابة تسقسي شيخ وتعرفي رأيو في القضية راسليهم في هذا الموقع

https://islamqa.info/ar

شوفي الجهة اليسرى حوسي تلقاي (ارسل سؤال) حطي سؤالك فيه واكتبيه بالفصحى وراح يجاوبوك
ان شاء الله

وربي يصلح الأحوال ان شاء الله

[صقر الجبال]

انا على حساب راي وواش احكيتي يعني مكانش حاجة انت اللي تندمي عليها
يعني ايلا انت متاكدة من الشخص وواثقة 100 في 100 بلي هو ما ياثر عليك حتى كلام

اما من جهة يخرج من السجن ويخلف الثار انا على حساب رايي ما يديرهاش لانو عارف بلي انت تعاودي تشكي بيه ويعاود يرجع مي انت لازم تاخدي الاحتياطات تاوعك قادر يجيك بوجه غير مكشوف يعني يديرللك حيلة من حيل تاوعو

اما من جانب حرام عليك ما حرام انت درتي الواجب تاعك وما غلطتي حتى في حاجة مادامك واثقة من الشخص بلي هو

ولله اعلم

[متأثرة]

الحمد لله ياربي سألت شيخ من المشايخ وقالي هو يبقى سارق سارق دخل للسجن بيك وبلا بيك ماعندك علاه تخافي
الحمد لله ياربي