،اجواء الاحتفال عندكم ،، يااو اروااحو احكولنا

[سجل..انا جزائرية]

المشاركة الأصلية كتبت بواسطة nadjofeva

السلام عليكم و رحمة الله و بركاته

و عليكم السلام و رحمة الله و بركاته
آهلآ اخت ناجو ..

ألف مبروك للفريق الوطني و لنا ،، ان شاء الله يحققون نتائج جيدة في المونديال و لا نشارك من أجل المشاركة خاصة أننا الممثل الوحيد للعرب ..

ان شاء الله نديرو حاجة ،، و بالاكـ نتاهلو للدور 2 علاش لالا ؟؟


بالنسبة للأجواء هنا فكانت جد ساخنة قبل و بعد المباراة الكل يحتفل سيارات و زغاريد و كلاكسونات
و غناء و les fumigènes و محارق(مفرقعات) بكل الألوان و ،، لا اختلاف في ظريقة التعبير عن الفرحة اذن (بعض الأجواء طيبة جميل أن ترى الفرحة تغمر الناس
و لكن البعض يصرعو الواحد و لا يعرفون كيف يحتفلون نهائيا) .. ههه
أما نحن في البيت ففرحنا بالفوز و شهادنا المباراة من بدايتها الى آخر ثانية على الأرضية و الجزيرة و كانت على الأعصاب و الكل ينتظر الهدف المؤهل لكأس العالم و بعد الهدف فرحنا و لكن زاد التوتر و الخوف من التعديل خاصة
و أن الهدف كان في الدقائق الاولى من بداية الشوط الثاني يعني الخصم له وقت كبير للتعديل على العكس احنا فرحنا ،، قلنا خلاص قتلولهم اللعب ،، و كنا نقارعو للهدف الثاني ( كبرنا كرشنا شوي هه )و اضافة أهداف قاتلة فكنا مناصرين من الدرجة الأولى لكن بهدوء دون جنون كما فعل البعض و بقينا طبعا في البيت ..و عادي .. و الحمد لله تأهلنا
اه ظبعا في البيت ،، قلة هم من خرجو للاحتفال في الخارج ،، خاصة بخصوص الاناث ( عيب )
رحم الله كل الموتى و ألهم أهلهم الصبر و السلوان ، آمين يا رب العالمين بالنهاية كانت مجرد مباراة لا تستحق أن تُقتل أرواح من أجلها فهنا ندخل في الهوس و اذا زاد الشيء عن حده انقلب الى ضده .. للأسف الناس ماهيش واعية ..
و للاسف الشديد بعض القنوات العربية ،، اخذت الامر للسخرية من الجزائر ،، و صارت تنتقد فرحةالجزائريين ' الغريبة ' للتاهل للمونديال
لم تخبرينا كيف كانت الأجواء عندكم مركي ؟؟
شكرا ..

شكراا لكـ ناجو ،، سررت بمشاركتكـ لنا

الاجواء عندنا لا تختلف كثيرا عنكم

منذ جمعة الرد على المغرب ،، و الناس راهي توجد من علامات و غيرها

يوم الثلاثاء ،، فالليسي الذكور ما حبوش يدخلو

و بما انو معظم التلاميذ في كلاصتي ذكور ( 13 من اصل 18 في المجموع ) ،،ايوااا خلاص ماكاش القراية

هممم كانو الذكور في الخارج يغنو و يصرخو ،، و الداخل الاناث ركبتهم العدوى ،، وحتى هوم ولاو يغنو و يزغرتو (ربي يهدينا )

المساء ما كاش القراية ،، حتى واحد ما راح لليسي ههه فاكونس من عندنا ،،

مع الثالثة ونصف مساء ( بعد العضر ) ،، حتى السابعة ،، دارو الديجي عندنا

كل اغاني الخضر داروهم ،، و كامل المنظقة عندنا ولات تسمع و تقول ان شاء الله بركـ نربحو

وقت المباراة انقسمنا فالدار فوجين ،، اناث يتفرجو وحدهم و الذكور وحدهم ههه ( كل واحد ما يتقلق من تعاليق الجنس الاخر )

اما الوالد مسكين ،، راح مع جارنا للمسجد ،، قالنا ما نتفرج ما تركبني الغمة خخ

في حين الوالدة ،، شدت سبحتها و الصلاية وراحت لاحدى الغرف و غلقت الباب ،، بش ما تسمع واالو خخخ

المهم بدينا نتفرجو نورمال ،، و تبااا ركبني السكر كي شفت الهدف دخل فالمرمى نتاعنا ،،بصح مزية كان اورجو

فالشوظ الاول بقيت غي رايحة جاية ،، غي ندور فالدار

و بداية الشوظ الثاني نفس الشي ،، حتى نسمع في اختي تصرخ وااااي بيت بيت سجلو

رحت نجري ،، تلاقيت مع الاعادة نتاع الهدف ،، الحق الحق ما فهمت فيه والو ،، ومن بعد جات الوالدة و ولات تسقسي شا كاين سجلو ؟ و اختي تقولها واه واه سجلووو صايي بوقرة سجل

فم بركـ قدرت نقضب كرسي و نتفرج ،،

كنت نورمال بصح شوفو مع اللقظة التالية ، نتاع العارضة اوووووف قلبي حبس ،، حسبتو بيت ههه

اما حفيظ دراجي عبر على الشعور نتاعي نيشان مع الاخر ،،

" صفر ما صفر لا لم يصفر نعم صفر لقد صفر صفففففر " خخخخخ

و اخيرااا ربحنا ، فرحت بزاااف ،،حسيت اللحظات نتاع 2009 راهي تتعاود ،، بقيت نشوف اجواء الفرحة في الملعب ،، تفاجئت بزااف لحسن و سوداني و روراوة و حليلو ، كااامل يبكو ،، عاضوني و الله و ظبعا وليت نغير فالقناة الارضية و الجزيرة شوية من شوية من

و بعدها بديت نسمع فالتبواظ و السيارات فالشارع ،،

بعدخمس دقايق لقيت روحي هنا في بيت الرعب نسجل في الدخول نتاعي ،،وللاسف ما كان حتى واحد داخل ،،

تعشينا ،،و من بععد رجعو دارو الديجي ،، وغاضتني بزااااف مين ولاو دايريين الغناء فالقنوات ويورو فاللقظات في وهران و عنابة و و و.. ، و انا نغسل فالماعين وعع

وليت رايحة جاية ،، كي نسمع الغناء نروح نتفرج ، و كي يكملو نرجع نغسل شوية حتى كملت خخخ ( ظبعا غسلتهممع كبريسة مش وحدي )

بعدها ظلعنا حنا البنات مع الوالدة للسظح ،، و بقينا شوي نتفرجو على الاجواء في الخارج،، ديجي والناس تصرخ و تغني مع الاغنية والعلامات و و و و

المهم ما رقدنااااش كامل لحتى تفرجنا في قناة النهار على الاجواء عند اللاعبين في مكان تغيير الملابس خخخ

في الغد ( الابعاء ) ،،الاهل ما خلاونيش نروح لليسي لانهم متاكدين ماكاش القراية

اخذنا الوالد لمدينة وهران ،، بش نشوفو الاجواء فم لكن للاسف الامظار كانت غازرة بزاااف و كامل الناس في ديراها

و عاود رجعنا لمدينة مستغانم ،، نفس الشي ،، فقظ لي كورتاج و العلامات ،، زاهيين في السيارات لا غير

رجعنا للدار ،، في ظريق بيتنا كانت الاجوااء رووعة ،، للاسف الظريق مبلعة و ممنوع المرور ،، ظبعا مبلعة بالشععب ،،بصحح الوالد تحايل و قدرنا نمرو هههه

لقينا العلامات فالاعلى تغظي كل الظرقات ،،، ( لدرجة انو الشمس ما تمرش كل المنظقة صارت ظل ) و الناس ولات متجمعة في الارصفة اليمين و اليسار

مرت شاحنة ،، معممممممممممممرة بالاظفال ،، حتى صنعو جبل ،،والي يحب يركب يركب ،، و ظبعا كانو يغنوو

بعدها فاتت حوالي 70 دراجة نارية ،، اي واحد عندو دراجةنارية يشاركـ ،، كل واحد مركب 2 ثلاثة و دايريين العلامات و يضحكو ،، تخيلو نتوم المشهد ،، بقينا غي نقراعو وقتاش يكملو و نضحكو ...

بعدها فات ' قرقابو ' ،، ( مناظق الشرق لا اظن انهم يعرفون هذا المصظلح ،، على كل هي شاحنة يركبو فيها مجموعة اشخاص موهوبين و محترفين في فن الموسيقى ،، يظبلو و يغنو ،، تلقاو كامل الالات الموسيقية فم ،،دربوكة و ناي و و و و ..)

و بعدها رجعنا للدار ،، قالنا خويا هذاوين حبسو الديجي ،، كانو دايرينوو يغنو وكامل الناس متلايمة كثر من البارح في الليل ( مزيةما قعدتش فالدار ههه )

في الغد قالولي صحباتي فالليسي ،،انو الذكور البارح جابو معاهم دربوكة وبداو يغنو ،، وختموها بقسما مع الدربوكة خخخ ونتوماتخيلو

اما الاساتذة بقاو يصورو في الذكور و هوم يغنو في قسما مع الدربوكة ،، بيسكـ قالولي خرجت فووور بزاف و الله اعلم

و ظبعا في ذاكـ النهار 'يوم الخميس' ايضضا ماكاش قراية ،، بقينا في الساحة ،،
فرحنانين بزااف علابيها ما نقدروش نركزو فالقراية هههه

كانت هذي هي الاجواء عندنا باختصار 'ههه '

[سجل..انا جزائرية]

المشاركة الأصلية كتبت بواسطة سيف الدين

السلام عليكم ورحمة الله وبركاته
و عليكم السلام و رحمة الله و بركاته
مرحبا مجددا ^ ^
آهلآ بكـ
حبيت نعلق فقط على كلام الاخت ماركي، استغربت يعني من الحطة الي عندكم نقصد
الي حصل في الثانوي، بنات تزغرد، والاولاد يغنيوا والمشكل ان الاستاذ قاعد يصور!!

اه ،، ما تستغربش يا خويا ،، البلاد خلاص راحت فيها ،،
الاساتذة دوكـ راهم يشجعو على هاذ الاشياء
اصصلا وش تتوقع الاستاذ يدير ؟ ،، والو استاذ كلاما لا غير
،
المهم علا جال هاذاكـ الشي الاهل ماخلاونيش نروح ،، يعني ليس قرار من فراغ
ربي يهدينا هذا ماكان

هاي الجزائر راحت فيها، الي حاب يرفع راس بلادو ويحترم علام بلادوا لازم في كلش
اللاعبين على الاقل داروا الي عليهم واهلوا البلاد، واحنا واش درنا !! ان شاء الله يتحسن
الوضع مستقبلا، ان شاء الله لان هذا الشيء الي نشوفوه في المؤسسة الي من مفترض تكون منبر
العلم كارثي جدا، والله يهدينا ويهدي الجميع ان شاء الله.
صراحة مالقيت شا نقولكـ ،، هذا جزء من الكل ،، و ما خفي كان اعظم
ومبارك للجزائر التأهل للمونديال

نظلبو من ربي يحسن الاحوال و يهدي النفوس

المشاركة الأصلية كتبت بواسطة سيف الدين

ايه هههه، بصح كما شفت الاخوة الفلسطينيين فرحانين بتأهل الجزائر
قلت هيا معليش مليح كما تأهلنا ههههه

الله يحفظك ^ ^

هههه صح المهم فرحناهم معانا
و يحفظكـ

المشاركة الأصلية كتبت بواسطة nadjofeva

ذكرتموني بأمر ما يوم الثلاثاء كنا في الجامعة قبل المبارة و لم ندرس فعلى الوحدة الزوج هكداك اتجهنا الى الحافلات الجامعية فرأينا الطلبة و ابناء تلك المدينة دايرين حالة عند الجامعة و السيارات تدخل وين كاين الحافلات الجامعية و بداو يهبلو و السيارات تدور و النيران و مانعرف قاع ولاد و بنات ماشي قال ولاد برك و كاميرات المهم حنا طلعنا الفوق بعدنا عليهم و رانا نسناو ليكوس يقلعو في البداية بداو محارق و المنظر كان جميل الألوان في السماء لكن اومبعد بداو يخلطو و غلقو طريق الجامعة و كي شافو هكداك ليكوس قلعو قبل الوقت شغل هربو لان الوضع اصبح خطيرا ..المهم خلاص ركبنا فلكوس

و ركبو معانا 3 أولاد شباب كانت الحرقة في قلبهم حبو يحتافلو و من سوء حظهم انو الكوس كان معمر بالبنات برك و بنات الي مايخالطوش فلا غناء لا زغاريد و لا حتى أي تفاعل و هوما ماقدروش فأصبح احدهم يقول واشبيكم ميتين قع هكدا غنو صفقو زغرتو اهدرو ياناس ليكيب ناسيونال راحا تلعب نتوما ماشي دزيريين نتوما ماتسيبورتوش واقيلا تسيبورتو بوركينا وووو ياودي السيد قريب هبل
و أومبعد كي شاف الامر لم ينجح وْلا يغني وحدو هو صحابو و يسيو يخرجو ملكوس ملفوق ... آه اومبعد قال واحد لصاحبو احفظهم هادو و الله مانزيد نركب مع حتى واحد فيهم .. و زاد شاف الكوس الي وراءنا دايرين حالة فيه زاد كمل مسكين ..و هذا كله لم نفز بعد لم نلعب بعد ..
و اومبعد قال لصاحبو انا مايهمنيش ربحت ولا خسرت راني حاب نفرح برك يعني كل هذا طلع حب يفرح برك و لا يهمه فوز الفريق .. صرعتنا ياوليدي حتى حنا ماناش حابين نزيدو نركبو وين تكون ...

يعني كانت ظالعتلو بش يغني هذا ،،، هههههههههههههه رايح يحقد السيد على حساب الشوفة
اه كامل يقولو هكـ ،،حناالمهم نفرحو ونزهاو ،، و الدليل منقبل الماتش وهوم يفرحو
يعني اذا كاش ولاكاش خسرو ،، حنا رانافرحنا و كملنا خخخ

[سجل..انا جزائرية]

المشاركة الأصلية كتبت بواسطة selsabile

و عليكم السلام و رحمة الله

لباس و نتي واشراكي خيتوو؟

الحمد لله

ايه واحد السخانة اهي عندنا تجمد الحجر قصدي تذوبه ههه

هههههه كيفكيف

ايه فرحنا بزااف بزااف
مع اني شاهدت فقط الشوط الاول لاني مللت كنت انتظرهم يسجلوا فيه و اللحظة اللي سجلوا فيها سمعت صراخ اخوتي و يقولوا "وااااي سجلنا سجلنا "ايا رحت نجري ليهم باسك كنت نتصفح النت و فرحت كي سجلنا و الحمد لله تأهلنا

يعني تقريبا كيفي ،،ماشفناش كي سجلو اول مرة حتى سمعناالصراخ بركـ

اممم بالنسبة لاجواء الاحتفالات كانت روعة فمدينتنا لم تنم تلك الليلة ههه طبعا لانهم من قبل المباراة و هم يوجدوا
،،
و في الثانوية ايضا الاجواء لا تختلف عنكم من زغاريد و المفرقعات ووو

،،

جميل ،،


و الشيئ الجميل في هذا هو ان جميع بيوت الجزائرين تعلوها الراية الوطنية
حتى بيتنا طبعا

شكرا خيتوو على الموضوع

دمتم بود ~

اه العلم الوظني صصح ،،وين ماتدوري تشوفيه
ذكرتيني بصديقة لي قالتلي نهار الاربعاء
( يا ودي هاذ العلام راه حالة
راني كي نغلق عيني نولي نشوفو ،،البارح حتى ما قدرتش نرقد وليت غي هو نشوف فيه )
هههههههههههه

شكرااا على المرور اختي عائشة

بوركـ فيكـ