الأحلام هى تخيلات و افكار بيشوفها الانسان و هو نايم. قبل ما يتطور العلم و تخرج البشريه من التخلف و العوالم الغيبيه اللى كانت مسيطره عليها كانت الأحلام بتتفسر بطرق خرافيه و بتعتبر محتوياتها نبوءات و رموز لوقايع مستقبليه و رسايل جايه من الغيب. فى الواقع الأحلام عباره عن تعبيرات و رموز لمحتويات مكبوته فى اللاشعور جايه من العالم اللى بيعيش فيه الانسان و مالهاش علاقه بالخرافات و الغيبيات اللى بيؤمن بيها الجهال فى المجتمعات المتخلفه ، و المثل الشعبى اللى بيقول " الجعان يحلم بسوق العيش " هو فهم شعبى صحيح و بسيط للأحلام و معانيها.
الحلم هو عمليه استخراج لمشاعر و دوافع و افكار متخزنه فى لاشعور الانسان بتظهر على شكل حكايات و كلام و صور خياليه وقت النوم.
تكوين الحلم Dream Work زى ماوضح العالم النفسى سيجموند فرويد هو عملية تحويل محتوى الحلم الموجود فى اللاشعور لمحتوى ظاهر فى الحلم ، و ده بيتم عن طريق تحوير و تشويه المحتوى المخفى فى اللاشعور عشان يقدر يظهر فى الحلم. سيجموند فرويد استخدم نظريته دى فى تفسير الأحلام عشان يقدر يوصل لمحتويات اللاشعور و عملياته فى العيانين اللى كان بيعالجهم و عشان يفسر حاجات كتيره من الأحداث اليوميه و النشاطات العقليه للانسان.
بيقول فرويد ان لما الانسان بينام بيحصل استرخا لعملية الكبت اللى بتكون موجوده وقت الانسان مبيكون صاحى. فالنوم بيدى فرصه لظهور الرغبات اللاشعوريه ، و اكمن الانسان وهو نايم جهازه الحركى بيقف فالرغبات دى مابتلاقيش فرصه للتحقيق غير على صورة خيالات و ده بيحصل عن طريق حاجتين :
الفكره: تحويل الرغبات لأفكار
الصوره: تحويل الافكار لصور مستمده من الصور المحفوظه فى الذاكره بحيث ان فى وقت الحلم بيتم تجميعها بشكل معين عشان تأدى الغرض المطلوب.
الفكره و الصوره بيحصل عليهم الانسان من تجاربه الشخصيه فى وقت صحيانه. وفى وقت الحلم بتتدخل مثيرات حوالين الانسان و هو نايم زى الضؤ و الأصوات وغيرها مع الرغبات اللاشعوريه و بكده بيتكون الحلم.
لمعرفة المصدر: اضغط هنا
2021-11-29, 11:29 AM
معلومات عن تفسير الاحلام والرؤى
العرض المتطور
