اقتباس:
المشاركة الأصلية كتبت بواسطة غزة لنا
السلام عليكم ورحمة الله تعالى وبركاته
عيدكم مبارك , أعاده الله علينا وعليكم بالصحة والخير والعافية
يا حسراااااه على العيد الي كان مطلوب منا فيه برك الاستمتاع وتحضير الالعاب لملاح باه نستمتعوا بيهم مع الأقارب ولبس أحسن الملابس باه نتباهوا بيهم بين الأقارب وفي نفس الوقت تطميع الكبار لينا -البريستيج- انتاعهم أكيد خالنا الكل لصغار نتمنى نكبروا بسرعة ومع هكذا كبرنا وأكيد نتمنوا ذرك لو كان نرجعوا صغار كيما كنا -صعيب بزاف ذرك وعلاااه مستحيل أصلا-في وقتها مانخمموا في والوا كل شيء كيما تقول جدتي -ربي يطول في عمرها- على الهُدى ونعيشوا اللحظة الي رانى فيها - وهكذا لازم تكون حياتنا الاستسلام التام للمولى سبحانه وتعالى وهذا هو الاسلام بكل بساطة -ولكن ذرك ولينا كبار !!!ملخص كلامي ماكاش مقارنة بين العيد انتاع بكري وذرك كل شيء تبدل ناس تفارق الحياة وناس جديدة تجي وحبين العيد يبقى كيما كان صعبية هذه المعادلة!
ومع كل هذا ماواحد ماينكر السرور والبهجة والجمعة انتاع العائلة في هذا اليوم المبارك وكأن الوقت توقف في هذا اليوم ومن بعد تعود الحياة لعادتها ونرجعوا حنا معها لانشغالاتنا وأعمالنا من دارة وجديد -وهذه سنة الحياة-
أستغفر الله وأتوب اليه
سلاااااااااااام
|
وعليكم السلام ورحمة الله وبركاته
الله يبارك على الطفولة الجميلة، واضح أن الجميع لما كانوا صغار استمتعوا بطفولتهم
وخلاتنا نسترجعوا ذكريات جميلة الي رسمة الابتسامة في وجوهنا، وانا نقول الأطفال
الصغار في الزمن نتاعنا واش راح يحكيوا على الطفولة نتاعهم يوم العيد كما يكباروا !!
ممكن كاين الي راهو يستمتع وممكن كاين عائلات راهي تحاول ترسم بسمة العيد
والبهجة في نفوس أطفالها وتخليهم يشتاقوا ويتحمسوا لأيام العيد، وممكن كاين الي
كما حالو كما حال أطفالو، ومع ذلك تبقى الطفولة نتاع جيلنا والاجيال الي سبقتنا طفولة
ولا اروع ..
ان شاء الله يتغير الواقع نحو الأفضل وان شاء الله نشوفو اعادة احياء مظاهر وعاداات
سواء كانت قديمة أو جديدة للعيد سواء كان عيد الفطر أو الأضحى ..
بارك الله فيك أخت الكريمة غزة لنا على مشاركتك لنا ذكرايتك مع العيد
دمت بخير وعافية