اورتيغا نتاعنا ^^

[سيف الدين]

السلام عليكم ورحمة الله وبركاته

أهلا وسهلا بيكم ..

شدني (جفاف) نتاع المواضيع اليومية، من أيام وانا قاعد نخمم على كاشي ما ندير موضوع
جديد هنا ، هيا مزية لقينا فيه موضوع جديد هههه

شقيقتي اليوم راحت درست عند واحد أستاذ يلقبوه بـ اورتيغا، وهو مختص في كل شيء الله
يبارك، هو راهو يدرس: الفلسفة، الرياضيات، الفيزياء، الفرنسية، اممم تبانلي هذا مكان،
ممكن الي يشوف المواد الي يدرسهم يقول هذا مش مختص وممكن يكون ناقص، بصح
راهو 444، لأنو حتى انا درست عندو رياضيات من قبل وايضا فرنسية .

انا رياضيات كنت ناقص فيها ، بصح كما قريت عندو وليت عبقري في الرياضيات
يعني عندو أسلوب في التبسيط ويعرف كيفاه يوصل المعلومة، يعني يخمم في بلاصتك
باش يوصلك المعلومة !

وأيضا راهو يتوقع الأسئلة نتاع السنة 5 ابتدائي ونتاع المتوسط وأيضا نتاع الباك ! ربي
يبارك، انا كنت نكره رياضيات بصح كما قريت عندو وليت نحبها ونحب الرياضيات، ومن
خلال مساري الدراسي كله ما شفتش أستاذ يعرف يوصل المعلومة كما هو ! نسيت
نقولكم بلي استاذ يقري في الدروس الخصوصية.

أورتيغا اممم انا كنت نحسب فيه كاشي اسم نتاع فبلسوف ولا عالم ولا، ولكن حوست في
النت لقيت واحد منهم لاعب رياضي وآخر رجل أعمال، ممكن يكونوا لقبوه بـ اورتيغا لأنو
يعرف كرة القدم.

انتوما كاشي ما عندكم حالة كما هاذي الحالة في منطقتكم أو لا، وتسميوا الناس الي
عندهم هاذي الملكة بأسماء نتاع شخصيات وو، كما هنا ثاني كاين واحد استاذ يعيطولو
طاليس وهو استاذ نتاع رياضيات، قريت انا عندو بصح الاسلوب نتاع التدريس مش كما
أستاذ الي حكيتلكم عليه.

وشكرا ^^