اورتيغا نتاعنا ^^

[nadjofeva]

المشاركة الأصلية كتبت بواسطة سيف الدين

السلام عليكم ورحمة الله وبركاته

أهلا وسهلا بيكم ..

و عليكم السلام و رحمة الله و بركاته
شكرا
ايييييييه ماناش قاع نديرو مواضيع
أمم هذا الاستاذ باين مليح الله يبارك فكرني بالعلماء تع بكري يختصو في كل حاجة ماشي قال قرا رياضيات يعرف رياضيات و برك و انما شحال من حاجة ،

يعني عندو أسلوب في التبسيط ويعرف كيفاه يوصل المعلومة، يعني يخمم في بلاصتك
باش يوصلك المعلومة !
يعجبني هذا النوع من الاساتذة

وأيضا راهو يتوقع الأسئلة نتاع السنة 5 ابتدائي ونتاع المتوسط وأيضا نتاع الباك ! ربي
يبارك،
ايه مليح نقول لاختي اجي تقرا عندو لأنها مسكينة يقروها وحد الاساتذة الله لا يشوفكم فيهم ،

الله يبارك ربي يكثر من أمثالو،
بالنسبة لحالة كيما هاذي عندنا مازال ماسمعتش في الأطوار الثلاثة و عندنا يعطولهم بأسماء (تنابز بالالقاب) و ليس لأنو مليح و لكن ماشي كامل ،


لكن في الجامعة درسنا أستاذ (هي في الحق كاين زوج بصح الثاني ماقراناش بزاف كيما الاول ) الله يبارك كي تخرج من عندو ماتحتاجش تجبد كراس ولا تراجع يوصل المعلومة و يقري بوحد الطريقة ماشاء الله (مع العلم أنه مش قاري في الجزائر) و هو كبير الآن قْرا بكري ، و هذا الاستاذ لعلمكم غني، يعني عندو بزاف خدْمات و مشاريع و حاجة ماتخصو و بالرغم انه مريض الآن ربي يشافيه و كبير الا انه لم يتوقف بعد عن التدريس و يحب يقري الأجيال يعني مش محتاج لهذه المهنة او للمال و انما يقري فعلا باش يعلم الناس و يؤدي رسالة عظيمة ،
للأسف و لسوء حضنا ماقراناش هاد لعام و لعام لي فات حتى انني في البداية صماطتلي لقراية من دونه فمعظم الاساتذة شويا ماشي كيما هو و كان الوحيد الي نستفادو منو بمعنى الكلمة ، و خاصة انه لا يلتزم بالبرنامج يعني الي جي في راسو يعلمهالنا اضافة للبرنامج طبعا و عندو تعلمنا عفايس مش برك في تخصصنا و شحال من مرة يسقسونا طلبة تع تخصصات اخرى عن امور على اساس مانعرفوهاش باش مانجاوبوش يلقاونا نجاوبو فيهم عادي فيعرفوان هديك العفسة اكيد قريناها عند هذا الاستاذ،
و لو كان كل الاساتذة مثله لكانت الاجيال تخرج مش برك قارية و الحاجة لمليحة فيه انو ماشي زعما انا نقول مليح و آخر يقول لالا و انما كل الدفعة تشهد له بذلك،

و طبعا كنت ندي عندو أعلى علامة
حتى أنني في آخر امتحان عندو شويا عميتها و اكلت بهدلة يعني ماشي بزاف طلعت المقياس ب14 بهدلني قالي ماوليتيش قاع تقراي و كانت آخر علامة اخذتها في هذاك السداسي عندو و في العادة دائما علامته اعلى علامة (راني قلت هذاك السداسي ماشي معنتها دايما ندي مليح)، (يعني غاضتني عمري هداك النهار علاش يقولي هكاك ، و هو يعرف الوالد و قلت لوالدي روح قولو بلي غير عندك لي ماداتش كيما موالف بالاك ماتقولوش و مع التالي هو قال لوالدي راهي خدمت كي العادة هي تقرا بصح ماشي كيما موالف هبطت شويا ، و كاين زوج حاجات مايعجبونيش فيه خارج لقراية ،
الأولى كل حاجة يقولها لوالدي مزيا ماجيت ندير والو و ايضا اتكلم مع ابي في كل مرة باش كاشما يقولو يعرف واش يجيبه و لكن عادي لأنه يمدحني فقط ،
و الثانية مانقولهاش لكنه أستاذ رائع ربي يحفظو و يشافيه و بالنسبة للنقاط مش لانه يعرف والدي لانه كان جارنا و عامين و أنا نقرا في الجامعة و قراني و ماعلابالوش بلي بنت صاحبو ولا جارتهم أخخ و عرف بعد ذلك بالصدفة عندما كان يتكلم مع أبي و لكنه ليس جارنا دوكا )
المهم كنت اعتبره مثل والدي و هو يعتبرني ابنته الصغيرة لان ولادو و بناتو قاع كبار ،
هذا من الاساتذة الي حابين نديرولهم تكريم ان شاء الله ربي يقدرنا و مانخرجوش من الجامعة قبل تكريمه ،
واقيلا خرجت قاع على الموضوع هاعلاديك مانحبش مرات نكتب ،
كاشما تفكرت استاذ كيما الاستاذ الي حكيتلنا عليه نعاود نولي ،
شكرا على الموضوع