اعطى رائيك حول29 نوفمبر2012

[~ Ḿĭ$ŝ mỷṣṭёяŷ]

السلام عليكم ورحمة الله وبركاته


1 ماهو رائيك حول الانتخابات البلدية؟؟

أنا نظن أن الانتخابات البلدية هي الوحدة الأساسية للتغيير، لأنو رئيس البلدية هو لي رايح يجيب التغيير للبدلية نتاعو، مش رئيس الجمهورية ولا حاجا خرا، هو لي راح يسقم الطرقان، وهو لي رايح يعمل إنارة للطرقات ، وهو لي رايح يجيب مشاريع، .....الخ

2 وهل ستغير من وضع المواطن شيء؟؟
أجل ستغيّر، ان اخترنا الاحق والاجدر بالمنصب، فأكيد سيتغر الأمر، وستتحسن الأوضاع، أو على الأقل نأمل أن يُخْتَار الأحق للمنصب

3 هل انت متفائل ام لالا؟؟
صراحة نعم، جد متفائلة، خاصة بالنسبة للبلدية التي أسكن فيها، وآمل أن يكون التغيير بفضل رئيس البلدية الجديد ان شاء الله

4 وهل ستنتخب ام لا؟
مع ذكر الاسباب؟
اممم، نعم سأنتخب وأعبّر عن صوتي، لأنني أنتمي لتلك البلدية وأهتم لشأنها، وأريد أن تتحسن الأوضاع فيها، أريد أن تعبّد الطرقات، أريد أن أرى الشوارع نظيفة، أتمنى أن تبنى جامعة بالبلدية، أريد أن لا أرى الشباب يقضون أوقاتهم كلها فالمقاهي، وفي فساد الأخلاق بسبب عدم توفر الشغل،.... نعم أريد كل هذه الأشياء و الكثير الكثير، وانا سأساهم بصوتي في حدوث هاذا التغيير،

لكن للاسف أنا مادون سن 18 ، إذا لا يمكنني الانتخاب، ولكن لو كان لدي الحق، لفعلت بدون تردد،

لانني بكل بساطة،

نحب بلادي، ونهتم ليها،

-------------------------------------------

شكرا جزيلا لك أخي على الموضوع، والله انا شخصيا كنت نفكر ندير نفس الموضوع بتقريب نفس الاسئلة ولكن سبقتني ^^

[~ Ḿĭ$ŝ mỷṣṭёяŷ]

ايه فقط حبيت نزيد ملاحظة بعدما قريت بعض المشاركات لفوق،

مش كامل الناس كذابين وخداعين ويخدمو مصالحهم،

كاين ناس أكفاء، ويحب بلادهم ويخدموها،

مش لانو الاعوام الماضية فاتو ناس مايخدموش، معناه، هاد المرة تاني نفس الشي،

خاصة مين كاين أحزاب جديدة، نظن فيه أمل،

ومش لانو صرا الغش فالانتخابات مرة، معناه كل مرة يحدث،

والله أعلم

[طايوان]

مرسي اختي على اعطاء رائيك لكن انت تعيشي بالجزائر ولست بامريكا حتى تتحقق هده المطالب
الواقع الذي نعيشه مر
وارجوا منك بعد الانتخابات بفتره ان تخبرينا مادا تغير

[طايوان]

اختي انت مازالك صغير الانسان الصالح مايشاركش لانه عارف كاين ناس فاسدين فوق واقوي منه لازم يتعامل معهم ويرضخ لهم
50 عام ونحن مع الانتخابات لكن لم اري شيء المهم ربي يجيب الخير هده المرة هدا مانقول

[أميرة الأحلام]

تغير هههههههههههههههههه و الله ياخو راك تحلم قصدك ماهي اخر الفضائح ربي يهديم ياكلو في دراه الشعب المسكين وهوما راقدينة

[طايوان]

ماتهدريش على الشعب لانه خلاص مابقتش فيه والو
لا رائحة الرجله ولا رائحة الاسلام
درك انا مانلومش المترشحين ليسرقوا
انا نلوم الشعب لوصلهم وطلعهم تميك هههه
صوتك امانة وستحاسب عليه يوم القيامة
انا مقاطع حتى احسب بسبب سارق

[~ Ḿĭ$ŝ mỷṣṭёяŷ]

العفو أخي،

لكن، الجزائر ليست أمريكا كما قلت أنت،

لو أردنا لجعلناها أحسن من أمريكا، وهادي أمريكا واش تكون؟؟؟ ناس كيفي كيفك، بصح واش عندهم زيادة؟؟؟؟ المخ لي يخمو بيه يعرفو يخمو بيه، مش كيفنا مطنحين،

واما تعليقا عن جملتك "50 عام ونحن مع الانتخابات لكن لم اري شيء"

أقول عفوا؟؟؟؟ 50 سنة لم تر شيء؟؟؟ يا أخي إذًا أنت لا ترى، وعذرا على هذه العبارة، في 50 سنة يا أخي، شيّدنا مالم يُشيّد في أي دولة، وأنج*** مالم تنجزه أي دولة،
خرجنا من بعد الاستعمار مدمرين فكريا ثقافيا، المجاعة تقتلنا، الامية 98 بالمية ( درسنا هذه النسبة في مادة التريخ السنة الماضية يعني ماجبتهاش من راسي)، ماعدنا لا تجارة لا صناعة لا اقتصاد لا والو
اليوم الحمد لله ، نقولو 90 بالمية ناس قاريين، آبار ناس كبار في لاج فوق 70 سنة لي مانخارطوش في محو الامية، الدراسة مجانية ، العلاج مجاني، ووووو بزاف صوالح، ماعدناش اكتفاء ذاتي ولكن نحاولو نوصلولو ونقولك حاجا حنا نحقو الاكتفاء الذاتي بالخدمة، بالزراعة بتربية المواشي، نديرو مصانع تاع منتوجات مختلفة نقدوذرو نصنعوها في بلادنا .....

ماراناش نقولو عدنا كلش؟؟؟ماراناش نقولو رانا كاملين ورانا ممتازين ومانشكيو من والو؟؟ حتا حاجا ماكاملا في هاد الدنيا، كاين غي ربي سبحانو لي كامل وياك؟؟
ولكن الواحد يحسّن الامور بيدو، "" ان الله لايغيرّ مابقوم حتى يغيرو مابأنفسهم """
يعني التغيير أخي يبدي من عقلك ومن قلبك نتا، لازم نتا أولا تقنع نفسك أنو مش كامل الناس فاسدين، مش كامل الناس يحوسو على المصلحة، وان كانت النسبة نتاعهم هي الغالبة، ولكن كاين ناس يحبو البلاد ويسعاو باش يخدموها صدقني، مالازمش الانسان يحكم هكا، أصلا هاد الشي حرام أنك تحكم غي هاك وتقول كدا وكدا،"" ان بعض الظن إثم"" ولكن جرّب كاش واحد يبانلك فيه الضوء شويا، تقرب من هاد الاحزاب روح سقسي شوف، فوطي على كاش واحد، خرج مش مليح؟؟ اسحب الثقة نتاعك منو وشوف وداخر، وجرب مرة ثانية، حتى تلقى لي يستاهل،
لكن ماتحكمش مباشرة
لكن انا مانظنش تحتاج باش تجرب باش تحكم، انا شخصيا نظن انك لو تقربت فقط من هادو لي مترحين على مستوى البلدية نتاعك من أحزاب مختلفة وحكيت معاهم ، راح تحكم عليهم ومباشرة تعرف شكون لي يستحق الصوت ولي مايستحقش،


صوتك امانة وستحاسب عليه يوم القيامة >>>> صح معاك حق، ولكن؟؟ اذا ماصوتش تاني راح تحاسب يوم القيامة، مولاك يوقلك، كان في يدك المفتاح باش تساهم في النهوض باهذه الدولة، خاصة انها مسلمة باش نتغلبو على الكافرين، ونوحدو العالم الاسلامي، ونعودو إلى سابق عهد، علاه مادرتش الصوت نتاعك؟؟ راح تقول كامل فاسدين و تاع مصالح؟؟؟ ونتا شكون قالك بلي كامل نتاع مصالح؟؟؟ لياه نتاع تعلم الغيب، ولي لي خلقك؟؟؟



ولا انت تكتفي فقط تقول أعطونا ديرونا جيبونا خدمونا، ... مادرتوناش ماخدممتوناش ...الخ، ونتا ماقدرتش مامبا تروح تفوطي، وتساهم فالتغيير،

التغيير انا وانت وهي وهو ونحن... من نصنعه يا أخي الكريم
----------------

على العموم كل واحد ورأيوو وهادا رايي

[طايوان]

هههههههه اختي احترام رائيك
كوريا الجنوبية في 50 سنة تحولت من فقر الى غناء
ومن تخلف الى تقدم
اوك روحي اقري تاريخها لكن نحن مادا
ابسط شيء ملعب 5 جويلية فضحهم والناس كامل ضحكوا
علابالك ولالا ان الاميار طلبوا من الرئيس ان يعمل لهم حصانه ايضا
تعرفي واش معني حصانة
اختي انت قولت لا تستطعين الانتخاب لانك سنك لم يصل
انا من المفروض عندي 4 سنوات وانا انتخب لكن لا اثق في احد
مى ان احترم رائيك لانه على قدر مجهودك ومجهود تفكيرك الكل يحلم لكن الحلم لا يتحقق بالامنيات

[طايوان]

اذا ماصوتش على الاقل عندي مبرر لانني لا اثق في احد الكل يخدم مصلحته لا مصلحة الشعب والنهار يلجي انسان يخدم انا وحدي نروح نجري نصوت عنه مش راح انتظره حتى هو يدعوني ههههههههههه
لكن انت ادا صوتي مادا تقولين ادا قالك انه يخدم مصلحته فقط؟؟؟؟؟

[~ Ḿĭ$ŝ mỷṣṭёяŷ]

معليش نبدي نجاوب من الأخير

لكن انت ادا صوتي مادا تقولين ادا قالك انه يخدم مصلحته فقط؟؟؟؟؟

اممم، راح نقولك، انا مارايحاش نصوت على نامبورطكي، وديجا واحد يخدم مصلحته، معناه ناقص عقل ودين، بسكو كون جا عنده عقل، يقول انا مادابيا البلدية نتاعي تكون خير من البلدية الفلانية، ( هه وحنا منطقتنا فيها بزاف هاد الطبيعة ) ويكونو فيها مرافق ، ويكون فيها الحياة سهلة، ومانشوفش ولاد المطقة نتاعي لي هوما ياإما لافامي، ياإما جيراني ياإما صحابي، ولكن أخواني بكل بساطة يدورو بالزنق لاخدمة لا والو مقابلين دعوي الشر الخيانة ومشتقاتها، ...وناقص دين، لانو الاسلام يقول من عمل عملا فليتقنه صح؟؟
مالي انا على الاقل نروح نشوف واحد مثقف وعنده نيفو، ومعروف بلي انسان مليح، خاصة اذا كانت البلدية صغيرة تقدر تعرف هاد الاشياء بطرق سهلة، واذا كان مدين يخاف ربي، ومافيها والو، اذا رحت عندو وحكيت معاه، وتأكدت بنفسي، لانو الشخص من طريقة كلامو تقدر تحكم على شخصيتو كي دايرا،
_________________________

آآه نعاودو نولو من الأول نجاوبو ^^

- ايه انا ماقتلكش درنا كلش في 50 سنة، ولكن ماتقوليش مادرنا والو؟؟؟ لان هادي والو يعني ماتحركناش من بلاصتنا؟؟ لياه من 1962 للـ 2012 نفس الشي؟؟؟ الجواب عندك

- ايه علابالي واش هي الحصانة، هاد لميار طنوحا طوسامبلومو، واش يدير هو بالحصانة؟؟؟ أصلا نورمالمو حتى الحصانة نتاع المجلس الشعبي الوطني يقلعوها، بسكو هي لي راهي مكلبتهم، دير لي تحب وماكانش لي يحكي معاك، يعني هادي حاجا تتعالج على مستوى المجلس الشعبي الوطني مادام هو لي يصيغ القوانين

- اختي انت قولت لا تستطعين الانتخاب لانك سنك لم يصل
انا من المفروض عندي 4 سنوات وانا انتخب لكن لا اثق في احد
مى ان احترم رائيك لانه على قدر مجهودك ومجهود تفكيرك الكل يحلم لكن الحلم لا يتحقق بالامنيات

هههههه غي هاد الجملة سابروف بزاف صوالح، واش قتلك مادون 18 سنة رديتني طفلة باش مانقولش كلمة أخرى؟؟
يعني انو هاد الكلام قدر تفكيري؟؟؟ نظن اني نقول كلام فيه الصواب، انا على الاقل نفكر بوزيتيفمو، وماشي نيـgـاتيفمو، و البوزيتيف، هو لي فيه الفايدا بيانسور
يعني كبير فلاج، كبير فلعقل؟؟؟ ههه معادلة خاطئة هادي يا أخي طايوان،

للاسف كانت المحادثة مشوقة، ولكن خسرتها لما استهنت بيا على أساس مادون 18 سنة،

على كل استمتعت بالحديث معك وتبادل الافكار و الآراء،

شكرا على موضوعك أخي، بارك الله فيك،
وصراحة نتمنى انو الفكرة هادي تتغير من ذهنك، لانك لو رجعت لدينك تلقى فيه عكس كلامك،

وشكرا