من مطبخ قصة حلم .. المعكرونة :)

[~ قصة حلم .. !]

السلام عليكم ورحمة الله وبركاته

ان شاء الله تكونوا كامل بخير

------
هاذ الطبق ساهل ويصلح للشباب لي يحبوا يجربوا يطبخوا .. ماشي معقد وبنين
نفوتوا لطريقة التحضير ( ما نعرفش ندير المقدمات مليح )


------

أولا نغليوا المعكرونة .. والطريقة معروفة ..

نحطوا الماء يسخن مليح حتى قريب يبدا يغلي .. ونحطوا المعكرونة .. + شوي ملح

كي تطرى المعكرونة .. نفرغوا الماء ونديروها في مصفاه كبيرة ونكبوا عليها ماء بارد ( من الحنفية ) ونشللوها .. باه ما تلصقش كي تنشف

من جهة اخرى نحضروا صلصة الطماطم

نقطعوا طرف دجاج قطع صغيرة .. ونقليوهم في شوي زيت ..
ونزيدوا فوقهم طماطم مرحية ( الكمية .. عينك ميزانك )
+ ملح
+ شويييية كمون
+ الفلفل الأسود يمد بنة .. بصح .. كثرت الهدرة على المضار تاعو .. .. نتي حرة في اضافتو
+ شوي طماطم مصبرة

بعد ما تطيب الصلصة .. تقطعي تزيديلها دبشة ( حشيشة مقطفة نورمالمون ) مقطعة

.....

في اناء الطهي .. تحطي شوي صلصة .. شوي معكرونة .. شوي صلصة وهكذا ..

وفي كل مرة تقطعي شوي فرماج ..

+ اذا كانت الطماطم لي استعملتيها ماشي مايهة بزاف زيدي معاها شوي ماء .. ( ماشي بزاف .. عندكي تكبي عليها برمة ماء وتقولي انوآآر لي قالت )

.....

وتدخليها للفرن ..

شوي هكذا وتبدا تغلي ..

كي تشوفي الصلصة نقصت .. تخرجيها

وترحي فوقها الفرماج ولا تحطي الفرماج المرحي الجاهز ..

وتعاودي تدخليها .. قيس ما يذوب

ملاحظة : ما تحطيش الفرماج المرحي من الاول .. باسكو ييبس ويمد ذوق ماشي مليح
حتان توجد خلاص باه ديريه .. وخليه يذوب


هاذو هوما صور الطبق ( الجودة والوضوح ربي يجيب )










صحة وعافية

أختكم ..
أنوآآر