السلام عليكم
واش راكم ان شاء الله بخير
المهم نبدا نحكي
نوض صباح بكري انا وخاوتي ونوجد لفطور ( المطوي والشاي والبيض المقلي ) هادي هيا العادة لي عندنا خصوصية يوم العيد . وبعدها ينوض بابا وخاوتي الذراري لي 2 وجداتي باش يفطرو وبعدها كي يفطرو ويخلصو يروحو يوجد رواحهم باش يصلو وانا نقعد الفوق في السطح باش نسمع تكبيرات العيد باسكو نموت عليها وخاوتي لتحت يعدلو في الدار ولما يكملو يجيو باش يذبحو الاضحية يذبحها بابا طبعا وخويا لكبير يعاونو وحنوما طبعا تلقاونا نستناو في دالتنا وبعد مانكملو كلشي نشوو الدوارة هههههه نموت عليها ...
ومبعدها يروح بابا وخاوتي لولاد باش يعيدو عالاقارب واحد واحد وحنوما نقعدو في الدار باش نرحبو بالزوار ...
والحاجة لي تعجبني لولاد الصغار كي يجيو يعيدو يهبلو ربي يحفظهم ان شاء الله ...
وانا تلقاوني قاعدة قدام الميكرو نشاتي مع صحباتي ونعيد عليهم اما ماما وخاوتي لخرين تلقاهم حاكمين برطابلاتهم ويعيدو على حبابهم ....
ومبعد لما يرجع بابا وخاوتي للدار نكونو حنوما وجدنا لفطور (الك*** ) ولما نخلصو نروحو نتفرجو شوية في التلفزيون حتان ياذن العصر ولما ياذن نخرج انا وصحباتي باش نعيدو رانا ندورو ندورو ندورو حتان ياذن النغرب ولما ياذن نولو للدار ..والعشا باينة واش رايحين نديرو اللحم المشوي باسكو هاذي هي العادة
وحقا نسيت الناس لي مذبحوش نعطوهم اللحم وكل دار تمد للي ماذبحش ... باش الاخ لي ماذبحش يحس عالاقل بالفرحة وتقوى رابطة الاخوة بينو وبين خوه
اليوم الثاني : كاينة عادة زيارة االمقــابر... لكي لا ننسى من ماتوا وكانوا يوما معنا
" ربي يرحمهم"
ومن بعد نروحو لدار جدي نقصرو شوية .
اليوم الثالث : نروحو للصحراء وندو معانا اللحم ونشووه ثما عالحطب ...
وان شاء الله نكون حكيتلكم مليح ...
العيد هو فرحة على الناس جميعا واتمنى ان تدوم هذه الفرحة في قلوب الناس وان يكونو متسامحين معا بعضم لان هذا اليوم يوم خير وحب عالى المسلمين
عيـــدكم مبارك وسعيد و جعلكم وإيانا من الصالحين الفالحين بالدنيا والآخرة...