هل للعيد طعم عندكم !!

[سيف الدين]

المشاركة الأصلية كتبت بواسطة nadjofeva

و عليكم السلام و رحمة الله و بركاته
الحمد لله
نعم أكيد حنا و نقولو تغير، فكيف بالكبار عندما يتكلمون تشعر أن العيد كان له طعم آخر في وقتهم و عندو حلاوتو ،
و بالنسبة لنا أيضا عندما كنا أطفالا كنا ننتظره بشوق ، لأننا سنلبس ملابس جديدة و نزور الأهل ،
و كانت والدتي ربي يحفظها دِيرلنا الحنة أيضا و نرقدو بيها ليلة العيد أو يوم قبلها و مانحركوش يدينا باش ماتخسرش و في الغد أول ما نقوم به هو غسل أيدينا و نفرحو كيما تخرج شابة،
و نلعبو بالنبولات أي البالونات (نْسَافات في الغرب) ، مانيش عارفة الاسم بالنسبة لبقية المناطق ،
محارق ماشي في العيد، و حتى النوم مايجيناش لأننا ننتظر صباح العيد، و في الصباح نستيقظ بكل نشاط و حيوية حتى اذا رقدنا ساعة،

دوكا زيارة الأهل نقصت لأننا لا نعيش في نفس المنطقة ، مكاش أهل بزاف هنا للأسف،
و أعز الأحباب بْعاد ، و كاين الي ماتو رحمهم الله ، و كي يروحو لكبار تصماط شويا الحالة (جدتي من الوالد و من الوالدة رحمهما الله ، خاصة جدتي من أمي كانت طيبة لدرجة كبيرة ) ،
الحنة مازال نديرو خاصة شقيقتي الكبرى ،
و النبولات أيضا (عندنا مخزون الله يبارك )،
آه نسيت النقود ، أكثر شخص كان يعطينا دراهم هو زوج عمتي رحمه الله أيضا ،
كنا كي نروحو عند عمتي حفظها الله و نجتمع هناك بزاف أطفال نوقفو gاع عند الحيط ، و يكون موجد كيس من النقود و يعطينا بلواحد مهما يكن العدد نتاعنا ..
و رغم الهيبة لي كانت عندو خاصة و انه كان مجاهدا الا اننا نحبوه بزاف، و له تعامل خاص مع الأطفال ،

بصح العيد يبقى عيد مهما تغير الزمان و المكان و تكون الفرحة أكيد دوما ان شاء الله ، و لازم حنا نخلو عندو طعم ..
شكرا على هذا الموضوع ، التكلم فيه يعيد لنا ذكريات الزمن الجميل ..

اييييه ما شاء الله أيام جميلة، أكيد كل واحد منا عندو ذكريات جميلة لأيام العيد وخاصة
في الطفولة.

الحنة انا نشفى كانت والدتي الله يحفظها ويحميها تديرلي الحنة رغما عني مش
متذكر إما في اليد اليمنى أو اليسرى، ونتذكر كنا نديروها ليلة قبل العيد، وفي الصباح
كيما نخرج للبرا يوم العيد راني نتلاقى بصحابي وراني نفوخ بيها ونقولهم نعتولي الحنة
نتاعكم، لانو تقريبا الأولاد الصغار وقتها كامل يديروا الحنة، واحيانا نحشم بيها .

نتذكر جارتنا الله يرحمها، كانت تحبنا وكانت ديما تزورنا، وكانت تعطيلي نقود، وجدتي
أم والدتي أيضا، وخاصة كما نروح لمدينة أمي أين أهل أمي.

البالونات أحنا في الشرق نسموها نفاخات، نتفكر كان فيه بالون كبير ممكن كان يتباع
حينها 5 د، نلعب بيه، وثاني مسدس الألعاب ومبعد شوي تطورت ووليت ندير
محارق وصواريخ هاذوك ههه، في هذا الصدد نتفكر واحد المرة والمشهد ما زال في
مخيلتي، كنا مجموعة من الأولاد وفاتوا علينا ممكن ثلاثة فتيات كبار شوي، هيا سيدي
أولاد هاذو الي كنت نخالط فيهم وأنا صغير قالولي ارمي عليهم المحرقة !! كاين إلي
قالي ارمى، وانا قلتهم ما نرميش علاه نرمي على بنات ونخلعوهم !!

لباس يوم العيد كنا نفرحوا بيهم، كنت نفوخ باللبسة نتاعي قدام أولاد الجيران اخخخ
كلش جديد، وخاصة أنني عمري ولا شريت لبسة من هنا، كانت جدتي أم والدي دائما
ترسل لي لباسا من هناك، يعني ولا واحد لبسة نتاعو تشبهلي

الحلويات يوم العيد كنا نحضروهم قبل أيام وخاصة يوم العيد الصغير، بينما العيد الكبير
ما كناش نديروا الكثير من الأنواع، والآن هنا عندنا نادرا وين نلقاوا الي يدير الحلويات
وممكن اذا كاينة راهي تكون مشرية واذا مش مشرية راهم يديروا مقروط ومادلان.

يوم العيد كنت نروح مع والدي نصلي صلاة العيد، وحينها كان ماكانش الجامع بالقرب
من حيينا، كنا نهبطوا للمدينة ونصليوا (بعيدة علينا كاشي 7 د مشي) وهذا المسجد
يعتبر من أكبر مساجد الولاية، كنا نسلموا على الناس الي نعرفوهم والي ما نعرفوهمش،
وبما أنو المسجد كبير وفيه غاشي بزاف، تجيب كاشي 2 سا ولا 1 سا، حتى أنك تحس
بالريق نتاعك نشف .

وصحيح كما قلتي أخت الكريمة احنا إلي نخليوا للعيد طعم، واحنا الي نفسدوا طعم نتاع
العيد، وهو العيد نفسوا مش راح يتغير، واعجبتني طريقة زوج عمتك (الله يرحمه
ويسكنه فسيح جناته) يمكن أن نتبع طريقته لادخال البسمة في وجوه الأطفال الصغار
كما فعل هو وكما فعل غيره من الاقارب الطيبين.

في العاصمة يوم العيد الصغير حكالي ابن عمي أنه عندهم في المسجد نتاع الحي في
ليلة قبل العييد كان عندهم فرح وعرس في المسجد، قالك كل واحد جاب السينية نتاع
الgاطو والبوبون وغيرها، الناس تسلم وتعاود وغيرها من مظاهر البهجة، وهذا
المسجد كنت حضرت فيه من قبل وعيدت العيد الصغير وما كانتش فيه هاذي المظاهر،
إلا أنه الواقع تغير نحو الأفضل ممكن بمبادرة نتاع كاشي شخص،..

مليح كما نعاودوا نحيوا مظاهر نتاع العيد، وما نخليوش العيد يكون ما عندوش طعم
واحنا رانا نشوفوا في الغرب كيفاه يحتفلوا بالاعياد نتاعهم وكيفاه يفرحوا ويديوا العطلة
باسابيع قبل العيد والمشتريات تكون الاسعار نتاعها منخفضة.

راني تحدثت بزاف .. اعتذر عن الاطالة

ان شاء الله يتغير الواقع وبارك الله فيك أخت الكريمة على مشاركتك لنا الموضوع
والأفراح التي عشتها قبل وأثناء العيد ^^

حفظك الله ورعاك ودمت بخير وعافية